जिद्द आणि कष्टांची प्रेरणादायी गाथा
प्रमोद रा.मेश्राम तालुका प्रतिनिधी मारेगाव
मारेगाव: छोटंसं गाव, मोठी स्वप्नं… आणि त्याहून मोठी जिद्द! मारेगाव तालुक्यातील केगाव येथील दुर्गे भावंडांनी आपल्या कर्तृत्वाने केवळ कुटुंबाचंच नव्हे, तर संपूर्ण गावाचं नाव उज्वल केलं आहे. शेतकरी कुटुंबातील अमित राजेश दुर्गे आणि आचल राजेश दुर्गे या भाऊ-बहिणींनी नुकत्याच पार पडलेल्या पोलीस भरती प्रक्रियेत दणदणीत यश संपादन करत पोलीस दलात स्थान मिळवले आहे. त्यांच्या या ऐतिहासिक यशाबद्दल विदर्भ एस. पी. न्यूज नेटवर्क, मारेगावच्या वतीने आज त्यांच्या घरी जाऊन उत्साहात सत्कार करण्यात आला.
या वेळी विदर्भ एस. पी. न्यूज नेटवर्कचे संपादक इंजि. सुरेश पाचभाई, उपसंपादक गजानन देवाळकर सर आणि प्रा. अनुप कुरेकर सर यांची उपस्थिती लाभली. मान्यवरांनी दुर्गे भावंडांचे मनापासून अभिनंदन करत त्यांच्या उज्ज्वल भवितव्यासाठी शुभेच्छांचा वर्षाव केला.
गरिबी, मर्यादित साधनसामग्री आणि अनेक अडचणींना सामोरे जात, हार न मानता पुढे जाण्याची जिद्द—याच बळावर दुर्गे भावंडांनी हे यश मिळवलं आहे. केगाव ते वेगाव असा दररोज सुमारे दोन किलोमीटरचा पायी प्रवास करत त्यांनी श्री जगन्नाथ महाराज विद्यालयात इयत्ता ५ वी ते १० वीपर्यंत शिक्षण पूर्ण केलं. परिस्थिती कठीण असली तरी ध्येय डोळ्यासमोर ठेवत त्यांनी अभ्यास आणि तयारीत सातत्य ठेवले.
त्यांच्या चिकाटीला यशाचं सोनं लाभलं—अमित दुर्गे यांची नागपूर येथे तर आचल दुर्गे यांची वर्धा येथे पोलीस विभागात निवड झाली. एका शेतकरी कुटुंबातील भाऊ आणि बहीण एकाच वेळी पोलीस दलात दाखल होणं ही केगावसाठी अभिमानाची आणि इतिहासात नोंद होण्यासारखी घटना ठरली आहे.
दुर्गे भावंडांची ही यशोगाथा ग्रामीण भागातील विद्यार्थ्यांसाठी प्रेरणादायी दीपस्तंभ ठरत आहे. “जिद्द असेल, मेहनत असेल तर यश निश्चित मिळते,” हा संदेश त्यांनी आपल्या कर्तृत्वातून दिला आहे. त्यांच्या यशामुळे परिसरात आनंदाचे वातावरण असून सर्वत्र त्यांच्यावर कौतुकाचा वर्षाव होत आहे.
विदर्भ एस. पी. न्यूज नेटवर्कच्या या सत्कार उपक्रमामुळे प्रतिभावान तरुणांना मिळणारे प्रोत्साहन निश्चितच समाजासाठी प्रेरणादायी ठरणार आहे.
