बातमी ऐका (Marathi Voice Reader)
कळमनुरी तालुक्यातील पिंपरी बुद्रूक येथील वाळूघाटावरील गौण खनिज उत्खनन प्रकरणात कंत्राटदारास तब्बल ८५ लाख रुपये दंडाची नोटीस उपविभागीय अधिकारी प्रतिक्षा भुते यांनी दिली आहे. या प्रकरणी ४८ तासात खुलासा करण्याचे आदेश देण्यात आले आहेत. कळमनुरी तालुक्यातील पिंपरी बुद्रूक शिवारातील वाळूघाटाचा लिलाव झाला होता. सदर लिलावातून वाळू घाट सिध्दांत बिल्डींग मटेरीयलचेे सिध्दांत नरवाडे कुपटी यांनी घेतला आहे. या वाळू घाटाच्या लिलावामध्येच सर्व अटी व शर्ती नमुद करण्यात आल्या होत्या. त्यानुसार वाळू घाटातून नियमानुसार ८९० ब्रास वाळू उपसा करणे अपेक्षीत होते. त्यानुसार या ठिकाणी वाळू उपसा करून वाहतूक केली जात होती. मात्र वाळू घाटावर चार बोटीद्वारे वाळू उपसा करून चार जेसीबीद्वारे वाळू व मुरुम भरून ११ हायवा द्वारे वाहतूक केली जात असल्याची माहिती महसूल विभागाला मिळाली होती. त्यानुसार जिल्हाधिकारी राहुल गुप्ता यांच्या मार्गदर्शनाखाली सहाय्यक जिल्हाधिकारी योगेशकुमार मीना यांच्या पथकाने ता. २७ मार्च रोजी रात्री छापा टाकला असता त्या ठिकाणी काही हायवामध्ये मुरुम तर काही हायवामध्ये वाळू आढळून आली. तसेच घाटावरील जेसीबीद्वारे रस्ता तयार करण्याचे काम केले जात असल्याचे पथकाला दिसून आले. त्यावरून सहाय्यक जिल्हाधिकारी योगेशकुमार मीना यांच्या पथकाने चार बोटी जाळून नष्ट केल्या तर ११ हायवा व चार जेसीबी आखाडा बाळापूर पोलिस ठाण्यात जमा केल्या आहेत. याबाबतचा सविस्तर अहवाल उपविभागीय अधिकारी कार्यालयाकडे सादर केला. त्यामध्ये ८९० ब्रास वाळू उपसा करणे अपेक्षीत असतांना प्रत्यक्षात १००० ब्रास वाळू उपसा केल्याचे अहवालात नमुद केले या शिवाय लिलावातील अटी व शर्तीचा भंग केल्याचे स्पष्ट करण्यात आले. यावरून उपविभागीय अधिकारी प्रतिक्षा भुते यांनी सिध्दांत बिल्डींग मटेरीयलचे सिध्दांत नरवाडे यांना नोटीस दिली असून यामध्ये एकूण दंडात्मक रक्कम ८५.७० लाख रुपये का आकारले जाऊ नये तसेच पुढील काळात अनाधिकृतरित्या गौणखणीज उत्खनन व वाहतूक करणार नाही याचे बंध प्रमाणपत्र का घेण्यात येेऊ नये याचा खुलासा ४८ तासात सादर करावा अन्यथा दंडात्मक कारवाई केली जाणार असल्याचा इशारा उपविभागीय अधिकारी भुते यांनी दिला आहे.
