बातमी ऐका (Marathi Voice Reader)
ठेवीदारांची २ कोटी ३८ लाख ५० हजार रुपयांची फसवणूक केल्याप्रकरणी ‘ट्रेडज इन्व्हेस्टमेंट प्रा. लि.’ कंपनीच्या दोन संचालकांना अटक करण्यात आली आहे. आर्थिक गुन्हे शाखेने ३० डिसेंबर रोजी हैद्राबाद विमानतळावर ही कारवाई केली. सचिन खडतरे (रा. करकंब, पंढरपूर, सोलापूर) आणि प्रसाद कुलकर्णी (वय ३६, रा. सारंग सोसायटी, नांदेडसिटी, पुणे) अशी अटक केलेल्या संचालकांची नावे आहेत. या प्रकरणी एकूण आठ जणांविरुद्ध गुन्हा दाखल करण्यात आला होता. आरोपी खडतरे आणि कुलकर्णी यांनी ठेवीदारांना शेअर बाजारात गुंतवणूक केल्यास दरमहा आठ टक्के परतावा मिळेल, असे आमिष दाखवले होते. त्यांनी ठेवीदारांकडून २ कोटी ३८ लाख रुपये जमा केले. कंपनीच्या संकेतस्थळावर परतावा मिळाल्याचे भासविण्यात आले, मात्र प्रत्यक्षात ठेवीदारांना कोणताही परतावा मिळाला नाही. ठेवीदारांच्या तक्रारीनंतर आरोपींविरुद्ध गुन्हा दाखल करण्यात आला होता. आरोपी परदेशात पसार होण्याची शक्यता असल्याने आर्थिक गुन्हे शाखेने त्यांच्याविरुद्ध ‘लूक आऊट नोटीस’ बजावली होती. ३० डिसेंबर रोजी सचिन खडतरे आणि प्रसाद कुलकर्णी हे शारजा येथून हैद्राबादला विमान प्रवास करत असल्याची माहिती आर्थिक गुन्हे शाखेला मिळाली. या माहितीच्या आधारे पथकाने हैद्राबाद विमानतळावर सापळा रचून दोघांना अटक केली. अतिरिक्त पोलीस आयुक्त पंकज देशमुख, आर्थिक गुन्हे शाखेचे उपायुक्त विवेक मासाळ, सहायक आयुक्त शुभदा संखे यांच्या मार्गदर्शनाखाली वरिष्ठ पोलीस निरीक्षक संतोष खेतमाळस, सहायक निरीक्षक चेतन मोरे, राजेश लांघी, विनोद चव्हाण आणि मुसळे यांच्या पथकाने ही कारवाई केली. अटक केलेल्या आरोपींना पुण्यातील विशेष न्यायालयात हजर करण्यात आले असून, न्यायालयाने त्यांना पोलीस कोठडी सुनावली आहे.
