लातूर जिल्ह्यातील निलंगा तालुक्यातील तांबाळा परिसरात घडलेल्या एका धक्कादायक घटनेने परिसरात भीतीचे वातावरण निर्माण झाले आहे. भरदिवसा काही अज्ञात हल्लेखोरांनी स्पोर्ट्स कार्ड खेळणाऱ्या एका क्लबमध्ये अचानक प्रवेश करत दहशत माजवली. या घटनेमुळे स्थानिक नागरिकांमध्ये मोठी घबराट पसरली असून, कायदा-सुव्यवस्थेचा प्रश्न पुन्हा ऐरणीवर आला आहे. मिळालेल्या माहितीनुसार, हल्लेखोर पूर्ण तयारीनिशी आले होते. त्यांच्या हातात बंदुका, तलवारी यांसारखी घातक शस्त्रे होती. क्लबमध्ये घुसल्यानंतर त्यांनी उपस्थित लोकांवर हल्ला चढवला. दहशत निर्माण करण्याच्या उद्देशाने त्यांनी हवेत गोळीबारही केला. अचानक झालेल्या या हल्ल्यामुळे क्लबमधील लोकांमध्ये एकच गोंधळ उडाला आणि अनेकांनी जीव वाचवण्यासाठी पळापळ केली. या हल्ल्यात चार ते पाच जण गंभीर जखमी झाले आहेत. जखमींना तातडीने उपचारासाठी हैदराबाद येथील खासगी रुग्णालयात हलवण्यात आले आहे. डॉक्टरांकडून त्यांच्यावर उपचार सुरू असून काहींची प्रकृती चिंताजनक असल्याची माहिती समोर येत आहे. या घटनेनंतर स्थानिक नागरिकांमध्ये प्रचंड भीतीचे वातावरण असून, सुरक्षेबाबत चिंता व्यक्त केली जात आहे. एका आरोपीला अटक दरम्यान, ही संपूर्ण घटना सीसीटीव्ही कॅमेऱ्यात कैद झाली असून पोलिसांसाठी ती महत्त्वाचा पुरावा ठरत आहे. पोलिसांनी तत्काळ कारवाई करत एका आरोपीला अटक केली आहे, तर इतर हल्लेखोरांचा शोध सुरू आहे. या घटनेमुळे तांबाळा परिसरात तणावाचे वातावरण असून, पोलिसांकडून अधिक तपास सुरू आहे. नागरिकांनी शांतता राखावी, असे आवाहन प्रशासनाकडून करण्यात आले आहे.
लातूर हादरलं! क्लबमध्ये घुसून बंदुकीचा धडाका, तलवारींचा मारा:शस्त्रांच्या जोरावर क्लबवर हल्ला; 5 जण गंभीर जखमी, एकाला अटक
Ad Banner
Show Comments (0)
Hide Comments (0)
Subscribe
Login
0 Comments
Oldest
