बातमी ऐका (Marathi Voice Reader)
बीड जिल्ह्यात गेल्या वर्षभरापासून गुन्हेगारीचे सत्र सुरूच असून, केज आणि अंबाजोगाई येथे दोन खळबळजनक घटना समोर आल्या आहेत. केजमध्ये एका तरुणाने एका घरात बेकायदेशीर प्रवेश करून, मुलीचे लग्न लावून न दिल्यास तिच्या वडिलांना जीवे मारण्याची धमकी दिली. तर दुसऱ्या घटनेत अंबाजोगाई येथे एका 28 वर्षीय महिलेला लग्नाचे आमिष दाखवून गेल्या दोन वर्षांपासून तिच्यावर बलात्कार केल्याचा धक्कादायक प्रकार उघडकीस आला आहे. या दोन्ही गंभीर प्रकरणांची दखल घेत पोलिसांनी गुन्हे दाखल केले असून, वाढत्या गुन्हेगारीमुळे जिल्ह्यात चिंतेचे वातावरण निर्माण झाले आहे. बीड जिल्ह्यातील केज तालुक्यातील एका खेडेगावात एका तरुणाने सायंकाळच्या सुमारास घराच्या छतावरून उडी मारून बेकायदेशीरपणे प्रवेश केला आणि “तुमच्या मुलीचे लग्न माझ्याशी लावून द्या, अन्यथा तिच्या वडिलांना जीवे मारीन” अशी धमकी देत मायलेकींना धमकवले. या खळबळजनक प्रकाराबाबत पीडित मुलीच्या आईने दिलेल्या तक्रारीवरून केज पोलिसांनी संबंधित तरुणाविरुद्ध विनयभंगाचा गुन्हा दाखल केला असून, या प्रकरणाचा पुढील तपास पोलिस करत आहेत. अंबाजोगाईत लग्नाचे आमिष दाखवून महिलेवर अत्याचार अंबाजोगाई शहरात लग्नाचे आमिष दाखवून एका 28 वर्षीय महिलेवर गेल्या दोन वर्षांपासून अत्याचार केल्याची संतापजनक घटना समोर आली आहे. या प्रकरणी सलमान अजीज पठाण या संशयित आरोपीविरुद्ध गुन्हा दाखल करण्यात आला असून, त्याने विवाहासाठी महिलेवर धर्मांतराची सक्ती केल्याचा आणि तिला धमकावल्याचा गंभीर आरोप पीडितेने तक्रारीत केला आहे. गुन्हा दाखल झाल्यापासून आरोपी फरार असून अंबाजोगाई शहर पोलिस त्याचा कसून शोध घेत आहेत. या घटनेबाबत अधिक माहिती देताना अंबाजोगाई शहर पोलिस ठाण्याचे पोलिस निरीक्षक शरद जोगदंड यांनी सांगितले की, पीडित महिला आणि आरोपी गेल्या तीन वर्षांपासून लिव्ह-इन रिलेशनशिपमध्ये राहत होते. फिर्यादी महिला विवाहित असून तिला चार अपत्ये आहेत. लग्नाचे आमिष देऊन विश्वासघात, अत्याचार आणि धर्मांतरासाठी दबाव टाकल्याप्रकरणी पोलिसांनी विविध कलमान्वये गुन्हा नोंदवला असून या प्रकरणाचा पुढील तपास सुरू आहे.
