बातमी ऐका (Marathi Voice Reader)
महाराष्ट्रात गाजत असलेल्या भोंदू अशोक खरात प्रकरणात एक नवी अपडेट आहे. न्यायालयाने खरातच्या पत्नीच्या अटकपूर्व जामिनावर सुनावणी करणे टाळले आहे. त्यावर आता मे महिन्याच्या अखेरीस सुनावणी होण्याची शक्यता आहे. यामुळे खरातच्या पत्नी कल्पना यांचा पाय आणखी खोलात गेल्याची चर्चा आहे. दरम्यान, न्यायालयाने नसरापूर येथील अल्पवयीन मुलीवरील बलात्कार व हत्या प्रकरणातील आरोपीला 24 मेपर्यंत पोलिस कोठडी सुनावली आहे. भोंदू अशोक खरातची पत्नी कल्पना खरात सध्या फरार आहे. त्यांनी यापूर्वी राहता येथील अतिरिक्त सत्र न्यायालयात अटकपूर्व जामिनासाठी याचिका केली होती. पण कोर्टाने ती फेटाळून लावली होती. त्यानंतर त्यांनी मुंबई उच्च न्यायालयाच्या औरंगाबाद खंडपीठात धाव घेतली. पण त्यांना तिथेही दिलासा मिळाला नाही. कल्पना खरातवर शिर्डी पोलिस ठाण्यात फसवणूक व बेकायदा सावकारीचा गुन्हा दाखला आहे. या गुन्ह्यात अशोक खरात व इतर आरोपींनी शेतकऱ्यांची 10 कोटींची जमीन बळकावल्याचा प्रयत्न केला होता. कल्पना खरातच्या वकिलांनी हा दिवाणी दावा असल्याचे नमूद करत या प्रकरणात यापू्र्वीच नोटीस बजावण्यात आल्याची बाब कोर्टाच्या निदर्शनास आणून दिली. जामिनावर मे च्या शेवटी सुनावणी होण्याची शक्यता कल्पना खरातचे वकील कोर्टाला म्हणाले, अशोक खरातवरील आरोपांमुळे संपूर्ण कुटुंब लज्जित झाले आहे. त्यामुळे आमच्या अटकपूर्व जामिनावर तात्काळ सुनावणी घेतली जावी. या प्रकरमी गत 6 मे रोजी नोटिसा जारी करण्यात आल्या होत्या. प्रकरण 12 मे रोजी ठेवण्याची मुभा देण्यात आली होती. पण आज न्यायालयीन कामकाजावरील ताण व प्रकरणातील गुणदोषांच्या आधारावर सुनावणी होऊ शकली नाही. आम्ही या प्रकरणी तातडीची सुनावणी घेण्याची मागणी केल्यामुळे कोर्टाने आम्हाला चालू महिन्याच्या अखेरच्या आठवड्यात न्यायालयीन सुट्टीत हे प्रकरण मांडण्याची मुभा दिली. नसरापूर प्रकरणातील आरोपीला 24 मेपर्यंत पोलिस कोठडी दुसरीकडे, नसरापूर बलात्कार व हत्या प्रकरणातील आरोपीला कोर्टाने 14 मेपर्यंत पोलिस कोठडी सुनावली आहे. या आरोपीला आज पुण्याच्या शिवाजीनगर सत्र न्यायालयात ऑनलाईन पद्धतीने हजर करण्यात आले होते. यावेळी कोर्टाने आरोपीला पोलिसांविरोधात काही तक्रार आहे का? असा प्रश्न केला. त्यावर आरोपीने नाही असे उत्तर दिले. या प्रकरणी संक्षिप्त सुनावणी झाल्यानंतर न्यायालयाने आरोपीला 24 मेपर्यंत पोलिस कोठडी सुनावली. या 70 वर्षीय आरोपीवर एका 4 वर्षीय मुलीवर बलात्कार करून तिची निर्घृण हत्या केल्याचा आरोप आहे. आरोपीने मुलीची हत्या केल्यानंतर तिचा मृतदेह शेणाच्या ढिगाऱ्याखाली लपवून ठेवला होता.
