बातमी ऐका (Marathi Voice Reader)
अहिल्यानगरहून खोपोली येथे आपल्या मामाच्या घरी जाणाऱ्या एका अल्पवयीन मुलीवर एका नराधमाने कल्याण रेल्वे स्थानकावर अत्याचार केल्याची संतापजनक घटना घडली आहे. नसरापूर अत्याचार प्रकरणामुळे अवघ्या महाराष्ट्रात संतापाची लाट उसळली असताना ही घटना घडली आहे हे विशेष. यासंबंधीच्या वृत्तानुसार, पीडित मुलगी अहिल्यानगर येथून खोपोली येथे आपल्या मामाच्या गावी जात होती. ती कल्याण रेल्वे स्थानकात लोकल ट्रेनची वाट पाहत उभी होती. त्यावेळी आरोपी सौरभ सोनावणे याने तिच्या हातातील मोबाईल हिसकावून घेतला. मुलीने त्याच्याकडे आपला मोबाईल परत मागितला असता त्याने ‘मोबाईल हवा असेल तर माझ्यासोबत पोलिस स्टेशनमध्ये चल’ असे सांगितले. त्यानंतर आरोपी मुलीला घेऊन कल्याण रेल्वे यार्डात गेला. तिथे त्याने तिच्यावर लैंगिक अत्याचार केला. यावेळी पीडितेने स्वतःची कशीबशी सुटका करून घेऊन रेल्वे पोलिस ठाणे गाठले. त्यानंतर पोलिसांना आपल्यावर गुदरलेला प्रसंग सांगितला. तिची आपबीती ऐकताच पोलिसांनी प्रकरणाचे गांभिर्य ओळखत तातडीने तपासाला सुरूवात केली. त्यांनी कल्याण रेल्वे स्थानकातील सीसीटीव्ही फुटेज खंगाळून आरोपी सौरभ सोनावणे याच्या मुसक्या आवळल्या. सध्या आरोपी पोलिसांच्या ताब्यात आहे. पोलिसांच्या मते, पीडित मुलीला कल्याणहून खोपोली येथे आपल्या मामाच्या घरी जायचे होते. त्यासाठी ती कल्याण रेल्वे स्थानकात लोकल ट्रेनची वाट पाहत होती. त्यावेळी आरोपीने तिचा मोबाईल हिसकावून घेत तिला आपल्यासोबत येण्यास भाग पाडले. त्यानंतर तिच्यावर अत्याचार केला. वर्दळीच्या रेल्वे स्थानकावर गुन्हा घडल्याने संताप उल्लेखनीय बाब म्हणजे कल्याण रेल्वे स्थानकावर 24 तास प्रवाशांची वर्दळ असते. एवढ्या वर्दळीच्या रेल्वे स्थानकावर हा प्रकार घडल्यामुळे मोठे आश्चर्य व्यक्त केले जात आहे. विशेषतः आरोपी मुलीला त्रास देत होता तेव्हाही तिथे काही प्रवाशी असल्याचेही दिसून येत आहे. पण त्यांची या मुलीला कोणतीही मदत झाली नसल्याचेही दिसून येत आहे. या एकूणच प्रकारामुळे रेल्वे स्थानकावरील सुरक्षा व्यवस्थेवरही प्रश्नचिन्ह उपस्थित होत आहे. नसरापूर प्रकरणात 1100 पानी आरोपपत्र दाखल दुसरीकडे, पुणे पोलिसांनी नसरापूर बलात्कार प्रकरणात आरोपी भीमराव कांबळे याच्याविरोधात तब्बल 1100 पानी आरोपपत्र विशेष न्यायालयात दाखल केले आहे. या आरोपपत्रात 50 हून अधिक साक्षीदारांचे जबाब, सीसीटीव्ही फुटेज, डीएनए टेस्ट, वैद्यकीय व न्यायवैद्यक अहवालाचा तपशील जोडण्यात आला आहे. महाराष्ट्र दिनी नसरापूर येते एका साडेतीन वर्षीय मुलीवर अत्याचार करून तिची दगडाने ठेचून हत्या करण्यात आली होती. या घटनेचे राज्यभर संतप्त पडसाद उमटले होते. पोलिसांनी या प्रकरणाचा अहोरात्र तपास करून गुन्हा घडल्याच्या 15 दिवसांतच शनिवारी रात्री आरोपीविरोधात आरोपपत्र दाखल केले.
