लाच प्रकरणात ग्रामसेवकाला जामीन मंजूर:सवना येथील घरकुलासाठी घेतली होती अडीच हजारांची लाच

सेनगाव तालुक्यातील सवना येथे घरकुलाच्या प्रस्तावासाठी अडीच हजार रुपयांची लाच घेणाऱ्या ग्रामसेवकास हिंगोलीच्या जिल्हा व सत्र न्यायालयाच्या न्यायाधीश एस. एन. माडे गाडेकर यांनी शनिवारी ता. १६ जामीन मंजूर केला आहे. सेनगाव तालुक्यातील सवना येथील एका लाभार्थ्याला मंजूर झालेल्या घरकुलाच्या पाहणी अहवालावर स्वाक्षरी करून प्रस्ताव पुढे पाठविण्यासाठी ग्रामसेवक रामप्रसाद खिल्लारी याने लाभार्थ्याकडे ५ हजाराची मागणी केली होती. मात्र त्यानंतर अडीच हजारात तडजोड झाली होती. या प्रकरणी लाचलुचपत प्रतिबंधक विभागाकडे तक्रार प्राप्त झाल्याने लाचलुचपत प्रतिबंधक विभागाचे उपाधीक्षक विकास घनवट, पोलिस निरीक्षक राजेश मलपिल्लू, सुलभा राऊत यांच्या पथकाने त्यास गोरेगाव येथील गोरेगाव चौफुली वर बुधवारी ता. १३ लाच घेतांना रंगेहात पकडले होते. या प्रकरणी गोरेगाव पोलिस ठाण्यात गुन्हा दाखल झाला. त्यानंतर त्यास न्यायालयाने एक दिवसांची पोलिस कोठडी सुनावली होती. पोलिस कोठडी संपल्यानंतर त्यास न्यायालयात हजर केल्यानंतर त्याची न्यायालयीन कोठडीत रवानगी केली होती. तर दुसरीकडे जिल्हा परिषदेने त्याच्यावर निलंबनाची कारवाई केली आहे. दरम्यान, ग्रामसेवक खिल्लारी याच्या वतीने ॲड. मनिष साकळे यांनी जिल्हा व सत्र न्यायालयाचे न्यायाधीश एस. एन. माने गाडेकर यांच्या न्यायालयात जामीनासाठी अर्ज दाखल केला होता. या अर्जावर दोन्ही बाजूंचा युक्तीवाद ऐकल्यानंतर न्यायालयाने त्याचा जामीन मंजूर केला आहे. याप्रकरणात ग्रामसेवक खिल्लारी याच्या वतीने ॲड. मनिष साकळे यांनी काम पाहिले. त्यांना ॲड. सिध्दार्थ थोरात, ॲड. अविनाश बांगर, ॲड. हर्ष बनसोडे, ॲड. चेतन अग्रवाल यांनी सहकार्य केले.