बातमी ऐका (Marathi Voice Reader)
लोकसभा आणि विधानसभा निवडणुकांच्या राजकीय धुमश्चक्रीनंतर आता राष्ट्रवादी काँग्रेस पक्षाने आगामी काळासाठी एक अत्यंत मोठा आणि गेमचेंजर निर्णय घेतला आहे. ‘डिझाईन बॉक्स’ या संस्थेशी करार संपल्यानंतर, राष्ट्रवादी काँग्रेस आता थेट देशातील सर्वात यशस्वी राजकीय रणनीतीकार अशी ओळख असलेल्या प्रशांत किशोर (PK) यांच्या हाती पक्षाची धुरा सोपवणार आहे. काल, १९ मे रोजी सकाळी राष्ट्रवादी काँग्रेस पक्षाच्या राष्ट्रीय अध्यक्षा सुनेत्रा पवार आणि खासदार पार्थ पवार यांच्यासोबत प्रशांत किशोर यांची एक उच्चस्तरीय बैठक पार पडली. या बैठकीत प्रशांत किशोर हे आगामी काळात राष्ट्रवादी काँग्रेसचे मुख्य रणनीतीकार म्हणून काम पाहणार यावर शिक्कामोर्तब झाले आहे. येत्या दोन दिवसांत या कराराच्या सर्व कायदेशीर बाबी पूर्ण केल्या जाणार असून, १ जून २०२६ पासून प्रशांत किशोर यांची कंपनी अधिकृतपणे कामाला सुरुवात करणार असल्याची विश्वसनीय माहिती सूत्रांनी दिली आहे. पुढील ३ वर्षे पक्षासाठी अत्यंत महत्त्वाची असल्याने राष्ट्रवादीने आतापासूनच २०२९ च्या सार्वत्रिक निवडणुकांसाठी रणशिंग फुंकल्याची चर्चा राजकीय वर्तुळात आहे. कोण आहेत प्रशांत किशोर? राजकीय वर्तुळात ‘पीके’ या नावाने प्रसिद्ध असलेले प्रशांत किशोर हे केवळ रणनीतीकार नसून ‘जन सुराज पक्षा’चे संस्थापकही आहेत. २०१४ च्या लोकसभा निवडणुकीत नरेंद्र मोदी यांच्यासाठी राबवलेली यशस्वी प्रचार मोहीम (उदा. चाय पे चर्चा) त्यांना देशभरात प्रकाशझोतात घेऊन आली. त्यानंतर त्यांनी बिहारमध्ये नितीश कुमार (JDU), पश्चिम बंगालमध्ये ममता बॅनर्जी (TMC), आंध्र प्रदेशात वाय. एस. जगनमोहन रेड्डी (YSRCP), तामिळनाडूत एम. के. स्टॅलिन (DMK) आणि दिल्लीत आम आदमी पार्टी (AAP) या सर्व पक्षांना सत्तेच्या शिखरावर पोहोचवण्यात महत्त्वाची भूमिका बजावली आहे. विशेष म्हणजे, राजकारणात येण्यापूर्वी प्रशांत किशोर यांनी संयुक्त राष्ट्रसंघासोबत (UN) सार्वजनिक आरोग्य क्षेत्रात तब्बल ८ वर्षे काम केले आहे. अजितदादांचे ‘गुलाबी कॅम्पेन’ गाजवणारे नरेश अरोरा बाहेर का झाले? यापूर्वी राष्ट्रवादी काँग्रेसच्या ब्रँडिंग आणि कँपेनिंगची संपूर्ण जबाबदारी ‘डिझाईन बॉक्स’ (Design Boxed) या कंपनीचे प्रमुख नरेश अरोरा यांच्याकडे होती. नरेश अरोरा यांनी यापूर्वी राजस्थान आणि कर्नाटकसारख्या राज्यांत काँग्रेससाठी मोठे काम केले आहे. राजकीय ब्रँडिंग, मेसेज मॅनेजमेंट आणि इमेज मेकओव्हर यात त्यांचा हातखंडा मानला जातो. लोकसभा निवडणुकीतील धक्क्यानंतर अजित पवार यांच्या पक्षाला नव्याने उभे करण्याची जबाबदारी नरेश अरोरा यांच्या टीमने घेतली होती. महाराष्ट्रात तुफान गाजलेल्या ‘लाडकी बहीण योजने’च्या प्रसिद्धीदरम्यान अजित पवार जे गुलाबी जॅकेटमध्ये फिरत होते, ते ‘गुलाबी कॅम्पेनिंग’ नरेश अरोरा यांचीच संकल्पना होती. या रणनीतीमुळे विधानसभा निवडणुकीत राष्ट्रवादीला अभूतपूर्व यशही मिळाले होते. मात्र, अजित पवार यांच्या दुर्दैवी निधनानंतर डिझाईन बॉक्सने आपले काम थांबवले. आता ‘ब्रँडिंग’ नाही, ‘पॉवर पॉलिटिक्स’वर भर! अजित पवारांच्या जाण्याने पक्षासमोर मोठे संकट उभे ठाकले आहे. अशा स्थितीत केवळ वरवरचे ब्रँडिंग करून चालणार नाही, तर तळागाळातील राजकीय गणिते जुळवावी लागणार आहेत, हे ओळखून सुनेत्रा पवार आणि पार्थ पवार यांनी थेट प्रशांत किशोर यांच्याकडे धाव घेतली आहे. ‘पीके’ यांच्या एन्ट्रीमुळे महाराष्ट्राच्या राजकारणात राष्ट्रवादी काँग्रेस आगामी काळात कोणती नवी चाल खेळणार, याकडे आता सर्वच राजकीय पक्षांचे बारीक लक्ष असणार आहे.
