बातमी ऐका (Marathi Voice Reader)
नागपूर विधान परिषदेची जागा ही बिनविरोध व्हावी या करता मी सर्वच पक्षाच्या नेत्यांशी बोलणार आहे. कारण नागपूरमध्ये 75 टक्केपेक्षा जास्त मते महायुतीकडे आहेत, त्यामुळे ही निवडणूक बिनविरोध व्हावी. राज्यात पेट्रोल डिझेलची टंचाई आहे, त्यामुळे राज्यभरात ज्या निवडणुका बिनविरोध होऊ शकतात त्या बिनविरोध केल्या पाहिजेत, त्याकरता आम्ही सर्वच जण पुढाकार घेणार आहोत, असे मंत्री चंद्रशेखर बावनकुळे यांनी म्हटले आहे. चंद्रशेखर बावनकुळे म्हणाले की, महायुतीमधील जागा वाटपावर तिन्ही पक्षाचेनेते एकत्र बसून चर्चा करतील. अनेक ठिकाणी या भूमिकेला सर्वच पक्ष साथ देतील. रायगड पालकमंत्रीपदाबाबत मुख्यमंत्री देवेंद्र फडणवीस आणि दोन्ही उपमुख्यमंत्री चर्चा करतील. आखाती देशांतील युद्धामुळे इंधन टंचाई चंद्रशेखर बावनकुळे म्हणाले की, आखाती देशातील युद्धामुळे जगावर मोठे संकट निर्माण झाले आहे, त्यामुळे जी पेट्रोल-डिझेल टंचाई निर्माण झाली आहे, त्याचे जे पडसाद आहे ते पडणारच आहेत. त्यावर पंतप्रधान नरेंद्र मोदी यांनी आवाहन केले आहे. कोरोनाच्या काळात त्यांनी आवाहन केले आपला देश बचावला आता आपत्तीच्या काळात आवाहन केले तसे देश सुधारेल. मोदींनी केलेलं आवाहन हळुहळु सगळे स्वीकारतील. यामध्ये राजकारण न करता पंतप्रधान मोदी यांनी जे आवाहन दिले आहे त्यांना पाठबळ दिले तर आपण यातून बाहेर पडू. वाहतूक कोंडी टाळण्यासाठी मंत्र्यांची ‘ऑनलाईन’ हजेरी चंद्रशेखर बावनकुळे म्हणाले की, मंत्रिमंडळ बैठकीला काही मंत्री ऑनलाईन पद्धतीने तर काही मंत्री तिथे उपस्थित राहतील. ज्यांचे विषय आहेत त्यांना मंत्रिमंडळ बैठकीसाठी उपस्थित रहावे लागले, ज्यांचे विषय नाही ते मंत्री ऑनलाईन बैठकीला उपस्थित राहतील.कोरोना काळात सुद्धा अशा बैठका घेण्यात आल्या आहेत. त्यामुळे वाहतूक कोंडीचा सुद्धा विषय सुटू शकतो. ऑपरेशन टायगरबद्दल माहिती नाही चंद्रशेखर बावनकुळे म्हणाले की, मुख्यमंत्र्यांना इतर पक्षाचे नेते येऊन भेटतात ते त्यांच्या मतदारसंघातील कामासाठी येऊन भेटत असतात. त्यांचा अर्थ असा नाही की आमच्या महायुतीमध्ये अलबेल नाही असे होत नाही. शिवसेनेच्या ऑपरेशन टायगरबद्दल प्रश्न विचारला असता त्याबद्दल मला काही माहिती नाही असे बावनकुळे यांनी म्हटले आहे.
