बातमी ऐका (Marathi Voice Reader)
पुण्यातील एरंडवणे परिसरातील नामांकित दीनानाथ मंगेशकर रुग्णालयात एका ६ वर्षांच्या चिमुरडीचा डोळ्यांच्या शस्त्रक्रियेदरम्यान मृत्यू झाल्याची धक्कादायक घटना घडली आहे. प्रियांशी जितेंद्र बागडे असे मृत मुलीचे नाव असून, तिच्या पालकांनी डॉक्टरांच्या निष्काळजीपणामुळेच मुलीचा बळी गेल्याचा गंभीर आरोप केला आहे. याप्रकरणी अलंकार पोलीस ठाण्यात तक्रार दाखल करण्यात आली आहे. मिळालेल्या माहितीनुसार, प्रियांशीला डोळ्यांच्या तिरळेपणा आणि काचबिंदूच्या उपचारासाठी रुग्णालयात दाखल करण्यात आले होते. मंगळवारी सकाळी तिला शस्त्रक्रियेसाठी ऑपरेशन थिएटरमध्ये नेण्यात आले. “माझी मुलगी आत जाताना पूर्णपणे शुद्धीत होती आणि खेळत होती, मग अचानक असे काय झाले?” असा टाहो तिच्या वडिलांनी फोडला आहे. शस्त्रक्रिया सुरू असतानाच मुलीची प्रकृती खालावली आणि डॉक्टरांनी तिचा मृत्यू झाल्याचे घोषित केले. नातेवाईकांनी आरोप केला आहे की, उपचारादरम्यान मुलीच्या तोंडातून रक्त येत होते, जे डॉक्टरांच्या अक्षम्य चुकीकडे बोट दाखवते. चुकीच्या भुलीमुळे (ॲनेस्थेशिया) किंवा उपचारातील हलगर्जीपणामुळे हा मृत्यू झाल्याचा संशय पालकांनी व्यक्त केला आहे. या घटनेनंतर संतप्त नातेवाईकांनी रुग्णालयात गर्दी केली होती. अलंकार पोलिसांनी या प्रकरणाची दखल घेत अकस्मात मृत्यूची नोंद केली आहे. मुलीचा मृतदेह शवविच्छेदनासाठी ससून रुग्णालयात पाठवण्यात आला आहे. “ससूनच्या वैद्यकीय समितीचा अहवाल प्राप्त झाल्यानंतरच मृत्यूचे अधिकृत कारण स्पष्ट होईल आणि त्यानंतरच पुढील कायदेशीर कारवाई केली जाईल,” असे पोलिसांनी सांगितले आहे.
