संजय खाडे यांच्या पुढाकारातून रक्तदान, वृद्धाश्रमात साहित्य वाटप व व्यावसायिक कार्यालय उद्घाटन
विदर्भ एस.पी.न्यूज नेटवर्क डेस्क: वणी
वणी: शेतकरी व कामगार नेते तथा महाराष्ट्र प्रदेश काँग्रेस कमिटीचे सचिव संजय खाडे यांच्या वाढदिवसानिमित्त शनिवार, दि. 23 मे रोजी वणी शहरात विविध सामाजिक उपक्रमांचे आयोजन करण्यात आले असून, समाजसेवा आणि विकासाचा संगम घडविणाऱ्या या उपक्रमांमुळे शहरात उत्साहाचे वातावरण निर्माण झाले आहे.
सकाळी 10.30 वाजता शेतकरी मंदिर, वणी येथे भव्य रक्तदान शिबिराचे आयोजन करण्यात आले आहे. “रक्तदान हेच श्रेष्ठ दान” हा सामाजिक संदेश देत नागरिकांनी मोठ्या संख्येने सहभागी व्हावे, असे आवाहन आयोजकांनी केले आहे. आजच्या धावपळीच्या जीवनात अपघात, शस्त्रक्रिया व विविध आजारांमुळे रक्ताची गरज सातत्याने भासत असताना एका रक्तदात्यामुळे अनेकांना नवजीवन मिळू शकते, या उदात्त भावनेतून हा उपक्रम राबविण्यात येत आहे.
दुपारच्या सत्रात वणी येथील वृद्धाश्रमात गरजूंना उपयुक्त साहित्याचे वाटप करण्यात येणार आहे. समाजातील ज्येष्ठ नागरिकांप्रती कृतज्ञता व्यक्त करण्याच्या उद्देशाने हा कार्यक्रम आयोजित करण्यात आला असून, त्याचबरोबर ग्रामीण रुग्णालयातील रुग्णांना फळवाटप करून मानवतेचा संदेश दिला जाणार आहे.दरम्यान, संध्याकाळी 6 वाजता शहरात डीएसके कन्स्ट्रक्शन अँड डेव्हलपर्स या नव्या व्यावसायिक कार्यालयाचे उद्घाटन खासदार प्रतिभाताई धानोरकर यांच्या हस्ते होणार आहे.
कार्यक्रमाच्या अध्यक्षस्थानी माजी शिक्षणमंत्री वसंतराव पुरके राहणार आहेत. संजय खाडे यांचे चिरंजीव धनंजय खाडे यांच्या नेतृत्वात सुरू होणारा हा व्यावसायिक उपक्रम विकासाभिमुख कामांना चालना देणारा ठरणार असल्याची चर्चा शहरात आहे.
या सर्व कार्यक्रमांच्या यशस्वी आयोजनासाठी संजय खाडे फाउंडेशन, जय जगन्नाथ मल्टीस्टेट पतसंस्था, श्री लक्ष्मीनारायण पतसंस्था तसेच संजय खाडे मित्रपरिवाराचे सदस्य परिश्रम घेत आहेत. सामाजिक जाणिवा जपत वाढदिवस साजरा करण्याच्या या उपक्रमाचे सर्व स्तरांतून स्वागत होत आहे.
