बातमी ऐका (Marathi Voice Reader)
जिल्ह्यात इंधनासाठी मारामारी होत असतांना एकीकडे कॅनमध्ये इंधन मिळणार नाही असा फलक लाऊन त्याच पंपावर चक्क कॅममध्ये भरून इंधन दिले जात असल्याचा प्रकार होत आहे. विशेष म्हणजे प्रशासनाच्या नाकावर टिच्चून पंप चालकांचा हा उद्दामपणा असल्याचे बोलले जात आहे.त्यातही आपले नेहमीचे गिऱ्हाईक सांभाळण्यासाठी काही पंप चालकांकडून आटापीटा केला जात असल्याचे बोलले जात आहे. हिंगोली जिल्ह्यात डिझेलचा पुरवठा कमी प्रमाणात होत असल्याने डिझेलची टंचाई निर्माण झाली आहे. जिल्हयातील 86 पेट्रोलपंपावर दररोज किमान 2 लाख लिटर डिझेल आवश्यक असते. मात्र सध्याच्या स्थितीत डिझेलची मागणी वाढल्याने तीन लाख लिटर डिझेल लागत आहे. त्यामुळे एक लाख लिटरची तुट कशी भरून काढावी असा प्रश्न प्रशासना समोर उभा राहिला आहे. दरम्यान, पेट्रोल पंपावर डिझेल भरण्याच्या कारणावरून हाणामाऱ्या होत आहेत. सेनगाव तालुक्यातील एका पंपावर हाणामारी झाली त्यानंतर शनिवारी ता. 22 रात्री कळमनुरी तालुक्यातील आराटी फाटा येथील पंपावर हाणामारी झाल्याची घटना घडली आहे. यामध्ये सेनगाव पोलिस ठाण्यात सार्वजनिक शांततेचा भंग केल्याच्या आरोपावरून गुन्हा दाखल करण्यात आला आहे. नियम फक्त कागदावर जिल्ह्यातील परिस्थिती लक्षात घेऊन जिल्हाधिकारी राहुल गुप्ता यांनी पेट्रोल पंप चालकांना कॅनमध्ये इंधन देऊ नये अशा स्पष्ट सूचना दिल्या. या शिवाय त्याबाबतचे फलक देखील लावण्यात आले आहे. त्यानुसार पेट्रोलपंप चालकांनी फलक देखील लावले आहेत. मात्र काही पेट्रोलपंप चालकांनी एकीकडे फलक लाऊन दुसरीकडे कॅनमध्ये डिझेल विक्री सुरु केल्याचे चित्र दिसून येत आहे. प्रशासनाच्या नाकावर टिच्चून हा प्रकार केला जात असल्याने आता प्रशासनाकडून काय भूमिका घेतली जाणार याकडे नागरीकांचे लक्ष लागले आहे.. या संदर्भात जिल्हा प्रशासनाशी संपर्क साधण्याचा प्रयत्न केला असता त्यांच्याशी संपर्क झाला नाही. त्यामुळे प्रशासनाची प्रतिक्रिया मिळू शकली नाही.
