बातमी ऐका (Marathi Voice Reader)
मुंबई-बंगळूर बाह्यवळण मार्गावर वडगाव पूल परिसरात भरधाव वाहनाच्या धडकेत एका महाविद्यालयीन तरुणाचा मृत्यू झाला आहे. महेश गजानन मानकर (वय २१) असे मृत तरुणाचे नाव आहे. या अपघातानंतर वाहनचालक घटनास्थळावरून पसार झाला. या प्रकरणी महेशचा मित्र सर्वेश गजानन शेळके (वय २०, मूळ रा. रेणुकानगर, डाबकी रस्ता, अकोला) याने नऱ्हे पोलीस ठाण्यात फिर्याद दिली आहे. त्यानुसार, पसार झालेल्या अज्ञात वाहनचालकाविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, महेश आणि सर्वेश एकाच शिक्षण संस्थेत शिक्षण घेत आहेत. मध्यरात्री एकच्या सुमारास महेश दुचाकीवरून मुंबई-बंगळूर बाह्यवळण मार्गावरून जात असताना, वडगाव पूल परिसरातील शौर्यश्री लॉनसमोर त्याला भरधाव वाहनाने धडक दिली. अपघातानंतर गंभीर जखमी झालेल्या महेशला तातडीने रुग्णालयात दाखल करण्यात आले, मात्र उपचारापूर्वीच त्याचा मृत्यू झाला होता. वरिष्ठ पोलीस निरीक्षक आसाराम शेटे यांनी घटनास्थळी भेट दिली असून, पसार झालेल्या वाहनचालकाचा शोध सुरू आहे. पोलीस उपनिरीक्षक एस. पवार या प्रकरणाचा तपास करत आहेत. भरधाव दुचाकीच्या धडकेत पादचारी ठार दरम्यान, पुणे-अहिल्यानगर रस्त्यावरील वाघोली परिसरातही एका भरधाव दुचाकीच्या धडकेत पादचारी ज्येष्ठ नागरिकाचा मृत्यू झाल्याची घटना घडली आहे. मृत ज्येष्ठ नागरिकाची ओळख अद्याप पटलेली नाही. या ज्येष्ठ नागरिकाचे वय अंदाजे ६० वर्षे असून, त्यांची ओळख पटवण्याचे काम सुरू असल्याची माहिती पोलिसांनी दिली. पोलीस शिपाई प्रवीण केदार यांनी वाघोली पोलीस ठाण्यात फिर्याद दिली असून, अज्ञात दुचाकीस्वार तरुणाविरुद्ध गुन्हा दाखल करण्यात आला आहे. पोलीस उपनिरीक्षक शिवशंकर राघू या प्रकरणाचा तपास करत आहेत.
