बातमी ऐका (Marathi Voice Reader)
पुणे शहरात दोन वेगवेगळ्या अपघातांमध्ये दोन ज्येष्ठ नागरिकांचा मृत्यू झाला आहे. या घटना येरवड्यातील गुंजन चित्रपटगृह चौक आणि पुणे-सोलापूर रस्त्यावरील लोणी काळभोर भागात घडल्या. दोन्ही प्रकरणांमध्ये संबंधित वाहनचालकांविरोधात गुन्हे दाखल करण्यात आले आहेत. पहिला अपघात पुणे-अहिल्यानगर रस्त्यावरील गुंजन चित्रपटगृह चौकात घडला. प्रदीप भीमराव यादव (वय ७६, रा. अक्षय बंगला, सैनिकवाडी, वडगाव शेरी) हे सायकलवरून व्यायामासाठी निघाले असताना एका मोटारीने त्यांना धडक दिली. या अपघातात त्यांचा मृत्यू झाला. यादव यांचा मुलगा शंतनू (वय ४६) यांनी लक्ष्मीनगर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, पहाटे पावणेचार वाजण्याच्या सुमारास ही घटना घडली. भरधाव मोटारीच्या धडकेने गंभीर जखमी झालेल्या यादव यांना रुग्णालयात दाखल करण्यात आले, परंतु उपचारादरम्यान त्यांचा मृत्यू झाला. पसार झालेल्या मोटारचालकाचा शोध सुरू असून, पोलीस उपनिरीक्षक एन. नलावडे या प्रकरणाचा तपास करत आहेत. दुसरा अपघात पुणे-सोलापूर रस्त्यावर लोणी काळभोर भागात घडला. युसूफ करीम शेख (वय ७०, रा. गांधी चौक, दौंड) हे पादचारी म्हणून रस्ता ओलांडत असताना एका भरधाव दुचाकीने त्यांना धडक दिली. यात त्यांचाही मृत्यू झाला. शेख यांचा मुलगा वसीम (वय ४५) यांनी लोणी काळभोर पोलीस ठाण्यात फिर्याद दिली आहे. लोणी काळभोरमधील कदमवाक वस्ती परिसरात ही घटना घडली. अपघातात गंभीर जखमी झालेल्या शेख यांचा रुग्णालयात उपचारादरम्यान मृत्यू झाला. या प्रकरणी दुचाकीस्वाराविरुद्ध गुन्हा दाखल करण्यात आला असून, पोलीस उपनिरीक्षक एस. जाधव पुढील तपास करत आहेत.
