बातमी ऐका (Marathi Voice Reader)
प्रतिनिधी | चांदूर रेल्वे शेतातील मंदिराच्या बांधकामासाठी पाणी सुरू व्हावे, या उद्देशाने वीज पुरवठा दुरुस्त करण्यासाठी ११ केव्हीच्या खांबावर चढलेल्या २४ वर्षीय युवकाचा करंट लागून मृत्यू झाल्याची हृदयद्रावक घटना सावंगी संगम परिसरात घडली. मृत युवकाचे नाव अंकुश श्रावणजी नेवारे असे आहे. अंकुश हा डीजे व्यवसायासोबतच विद्युत संबंधित छोटी-मोठी कामे करीत होता. त्याच्या कुटुंबाची हडपा शिवारात सुमारे दोन एकर शेती असून शेतातील वीजपुरवठा बंद असल्याने लाईन सुरू करण्यासाठी तो प्रयत्न करीत होता. माहितीनुसार शुक्रवारी सायंकाळी पाच ते साडेपाच वाजताच्या सुमारास अंकुश शेताजवळील ११ केव्ही विद्युत पोलवर चढून जंपर बदलण्याचे काम करीत होता. संबंधित लाईन दररोज सायंकाळी चार वाजता बंद होऊन सहा वाजता सुरू होते, असा त्याचा समज होता. मात्र अचानक विद्युत पुरवठा सुरू झाल्याने त्याला वीजेचा जोरदार धक्का बसला आणि तो मृत झाला. काही काळ प्रतीक्षा केली असती तर घात टळला असता गावकऱ्यांच्या माहितीनुसार, अंकुशच्या शेतात मंदिर बांधकाम सुरू होते. बांधकामासाठी पाण्याची गरज असल्याने बंद पडलेली लाईन सुरू करण्याचा तो प्रयत्न करीत होता. मात्र नियतीने घात केला आणि या तरुणाचा जागीच मृत्यू झाला. अंकुशच्या पश्चात आई-वडील व भाऊ असा परिवार असून, या घटनेमुळे सावंगी संगम गावावर शोककळा पसरली आहे.
