देशी बनावटीचा कट्टा सोबत घेवुन फिरणाऱ्याला ग्रामीण पोलिसांनी तालुक्यातील सांडवा येथे अटक केली. त्याच्याकडून देशी बनावटीचा कट्टा जप्त करण्यात आला असून ही कारवाई बुधवार दि. २७ मे रोजीच्या संध्याकाळी करण्यात आली. अटक केलेल्या आरोपीला पुसद न्यायालयामध्ये हजर केले असता एक दिवसाची पोलिस कोठडी सुनावण्यात आली आहे. शेख अतिक शेख रशीद वय २५ वर्ष रा. शिवाजी वार्ड असे अटक केलेल्या आरोपीचे नाव आहे. ग्रामीण पोलिस ठाण्याच्या सूत्रांकडून मिळालेल्या माहितीनुसार सांडवा परिसरामध्ये एक जण अवैधरित्या देशी बनावटीचा कट्टा घेऊन फिरत असल्याची माहिती पोलिसांना पेट्रोलिंग दरम्यान मिळाली होती. त्या माहितीच्या आधारे ग्रामीण पोलिस ठाण्याचे ठाणेदार आशीष चौधरी, सहाय्यक फौजदार शेख मसूद, पोलिस अंमलदार योगेश आळणे, केशव मुंढे, अक्षय मोटे, सुनील देव्हारे, शेख सद्दाम, निकिता यांनी सांडवा परिसरात धाव घेतली. त्यानंतर संशयित तरुणाला ताब्यात घेतले. पोलिसांनी त्याची अंग झडती घेतली असता त्याच्या कमरेला एक देशी बनावटीचा १५ हजार रुपये किमतीचा गावठी कट्टा आढळून आला होता. त्याप्रकरणी ग्रामीण पोलिस ठाण्यामध्ये त्याच्या विरोधात विविध कलमान्वये गुन्हे दाखल झाले आहे. प्रकरणाचा अधिक तपास ग्रामीण पोलिसांकडून सुरू आहे.
