बातमी ऐका (Marathi Voice Reader)
३१ मे रोजी जगभरात पाळल्या जाणाऱ्या ‘जागतिक तंबाखूमुक्त दिना’चे औचित्य साधून इंडियन डेंटल असोसिएशन अहिल्यानगर शाखेच्या वतीने शहरात तंबाखूविरोधी व्यापक जनजागृती मोहीम आणि मौखिक कर्करोग (तोंडाचा कॅन्सर) तपासणी शिबिराचे आयोजन केले आहे. देशातील सुमारे ३० टक्के कर्करोग हे तोंडाशी संबंधित असून, तोंडाच्या कर्करोगाच्या जवळपास ८० टक्के रुग्णांमध्ये तंबाखू सेवन हेच मुख्य कारण असल्याचे संशोधनातून समोर आले आहे. ग्रामीण भागात तसेच कामगार वर्गामध्ये गुटखा, तंबाखू आणि सुपारी सेवनाचे प्रमाण अधिक असल्याने हा आरोग्य आणीबाणीचा विषय बनला आहे. या वाढत्या व्यसनाधीनतेमुळे समाजात निर्माण होत असलेल्या गंभीर आरोग्य समस्यांविषयी नागरिकांमध्ये जागरूकता निर्माण करण्यासाठी हा व्यापक उपक्रम राबविण्यात येत आहे. तंबाखूजन्य पदार्थांचे सेवन हे केवळ वैयक्तिक आरोग्यासाठीच नव्हे, तर संपूर्ण कुटुंबासाठी घातक ठरत आहे. व्यसनामुळे आर्थिक नुकसान, मानसिक तणाव, कौटुंबिक कलह तसेच सामाजिक असुरक्षितता निर्माण होत असल्याचे चित्र सर्वत्र दिसून येत आहे. तंबाखू सेवनामुळे तोंडाचा, घशाचा आणि फुफ्फुसाचा कर्करोग, हृदयविकार, श्वसनाचे आजार, रक्तदाब, दात व हिरड्यांचे गंभीर विकार यांसारख्या अनेक जीवघेण्या आजारांचा धोका वाढत असल्याचे दंततज्ज्ञांनी स्पष्ट केले. विशेषतः गुटखा आणि माव्याच्या सतत सेवनामुळे तोंडातील पेशींमध्ये होणारे बदल पुढे जाऊन मौखिक कर्करोगाला कारणीभूत ठरत आहेत. इंडियन डेंटल असोसिएशन अहिल्यानगर शाखेच्या वतीने यावर्षी विशेष उपक्रम म्हणून बीडी कामगार, माथाडी कामगार तसेच एमआयडीसी परिसरातील कामगारांसाठी विशेष मौखिक कर्करोग तपासणी व तंबाखूमुक्ती जनजागृती शिबिर आयोजित करण्यात आले आहे. या शिबिरात तंबाखूचे दुष्परिणाम, व्यसनमुक्तीसाठी उपलब्ध उपाययोजना, आरोग्य सल्ला तसेच मौखिक कर्करोगाची सुरुवातीची लक्षणे याबाबत सविस्तर मार्गदर्शन करण्यात येत आहे. व्यसन सोडणे हा निरोगी आयुष्याकडे नेणारा निर्णय “तंबाखूचे व्यसन सोडणे हा निरोगी आणि सुरक्षित आयुष्याकडे जाणारा सर्वात महत्त्वाचा निर्णय आहे. युवकांनी व्यसनांपासून दूर राहून आरोग्यदायी जीवनशैली स्वीकारणे ही काळाची गरज आहे,” असे आवाहन ‘आयडीए’ अहिल्यानगर शाखेचे अध्यक्ष डॉ. ओंकार भालसिंग यांनी केले. तर संस्थेच्या सचिव डॉ. शिल्पा इनमुलवार यांनी सांगितले की, नियमित तोंड तपासणीमुळे कर्करोगाची लवकर ओळख होऊन जीवितहानी टाळता येऊ शकते. या जनजागृती मोहिमेसाठी इंडियन डेंटल असोसिएशन अहिल्यानगर शाखेच्या आणि जिल्हा दंत वैद्यकीय शाखेच्या सर्व पदाधिकाऱ्यांचे मोलाचे सहकार्य लाभले आहे.
