शिंदेसेनेकडून बाजोरीया यांचा पत्ता कट:अल्पसंख्यांक आघाडीचे प्रदेशाध्यक्ष सईद खान यांच्या नावाची घोषणा, महायुतीत धुसफुसीची चिन्हे

परभणी-हिंगोली विधान परिषद निवडणुकीत उमेदवारी अर्ज दाखल करण्याच्या अखेरच्या दिवशी नाट्यमय घडामोडी घडल्या. शिंदेसेनेतून उमेदवारीसाठी प्रबळ दावेदार असलेल्या माजी आमदार विप्लव बाजोरीया यांचा पत्ता कट होऊन शिंदेसेनेचे अल्पसंख्यांक आघाडीचे प्रदेशाध्यक्ष सईद खान यांची उमेदवारी जाहिर झाली आहे. त्यामुळे आता महायुतीत मतदानावरून धुसफूस होण्याची चिन्हे दिसून लागली आहेत. परभणी- हिंगोली विधान परिषदेची जागा महायुतीमध्ये शिंदेसेनेने सोडवून घेतली. त्यामुळे पुन्हा एकदा बाजोरीया यांचे नांव पुढे आले होते. बाजोरीया यांनी देखील मतदारांशी संपर्क साधून आपण रिंगणात उतरणार असल्याचे जाहिर केले होते. त्यानंतर माजीमंत्री अर्जुन खोतकर यांचे चिरंजीव अभिमन्यू खोतकर यांनीही उमेदवारीसाठी दावा केला होता. त्यामुळे खोतकर की बाजोरीया यापैकी एका नावावरच अंतिम निर्णय होणार असल्याचे बोलले जात होते. दरम्यान, शिंदेसेनेच्या नेत्यांनीही नेमके कोणाच्या नावावर शिक्कामोर्तब होणार ही बाब अतिशय गोपनिय ठेवली होती. त्यातच खोतकर यांनी निवडणुकीतून माघार घेत असल्याचे जाहिर केल्यानंतर बाजोरीया यांनाच उमेदवारी मिळेल असा कयास राजकिय वर्तुळातून बांधला जाऊ लागला होता. त्यातून काही मतदारांनी बोजारीया यांच्याशी संपर्कही साधून आपला पाठिंबा असल्याचे स्पष्ट केले होते. त्यानंतर आज उमेदवारी अर्ज भरण्याच्या अखेरच्या दिवशी शिंदेसेनेत नाट्यमय घडामोडी झाल्या अन अल्पसंख्यांक आघाडीचे प्रदेशाध्यक्ष सईद खान यांना उमेदवारी दिली जात असल्याचे जाहिर केले. त्यानुसार सईद खान यांनी महायुतीच्या नेत्यांसह कार्यकर्त्यांशी संपर्क साधला आहे. ऐनवेळी सईद खान यांची उमेदवारी जाहिर झाल्याने आता महायुतीमधील पक्षातील मतदारांना पक्षादेश पाळावा लागणार आहे. त्यामुळे हि निवडणुक ‘कोरडी‘ जाणार असल्याची चर्चा सुरु झाली आहे. दरम्यान, निवडणुकीच्या रणधुमाळीत मतदारांची फोडाफोडी होणार असल्याचे बोलले जात असून महायुतीमधील अंतर्गत धुसफुस उमेदवारासाठी अडचणीची ठरणार असल्याचे राजकिय वर्तुळातून बोलले जात आहे. त्यामुळे आता मतदारांच्या ‘धना‘ वरच निवडणुकीत जय पराजयाचे गणित अवलंबून असणार असल्याचे चित्र आहे.