बातमी ऐका (Marathi Voice Reader)
प्रतिनिधी | अमरावती विभागीय संदर्भ सेवा रुग्णालयात ( सुपर स्पेशलिटी हॉस्पिटल) पुण्यश्लोक अहिल्यादेवी होळकर यांची जयंती साजरी केली. रुग्णालयातील महिला कर्मचाऱ्यांनी पुढाकार घेत या कार्यक्रमाचे नेटके आयोजन केले. याप्रसंगी आयोजित अध्यक्षस्थानी डॉ.दिव्यांनी मुंदाने होत्या, तर प्रमुख अतिथी म्हणून डॉ.माधुरी गाडेकर उपस्थित होत्या. उपस्थित मान्यवरांनी अहिल्यादेवी होळकर यांच्या प्रतिमेचे पूजन करून त्यांच्या लोककल्याणकारी कार्यास अभिवादन केले. कार्यक्रमाचे प्रमुख पाहुणे व अध्यक्षांनी अहिल्यादेवी होळकर यांचे विचार, कार्य अधोरेखित केले. उन्हाळ्याचे दिवस आणि रुग्णांची गरज लक्षात घेता, रुग्णालयाचे वैद्यकीय अधीक्षक डॉ.अमोल नरोटे यांनी जयंतीनिमित्त रुग्णालयात एक लोकोपयोगी उपक्रम राबवण्याची संकल्पना मांडली होती. त्यांच्या या संकल्पनेला रुग्णालयातील अधिकारी, कर्मचाऱ्यांनी प्रतिसाद दिला. कर्मचाऱ्यांनी एकत्र येत, निधी गोळा करून रुग्णालयाला एक वॉटर कुलर’ भेट दिला. यामुळे रुग्णालयात येणारे रुग्ण, त्यांच्या नातेवाईकांसाठी थंड पिण्याच्या पाण्याची सोय झाली आहे. महिलांनी केलेले उत्कृष्ट नियोजन आणि कर्मचाऱ्यांच्या सामूहिक दातृत्वामुळे या जयंती महोत्सवाचे सर्वत्र कौतुक होत आहे. कार्यक्रमाला रुग्णालयातील डॉक्टर, परिचारिका, प्रशासकीय कर्मचारी व चतुर्थश्रेणी कर्मचारी उपस्थित होते.
