प्रतिनिधी|अहिल्यानग र अहिल्यानगर शहरात रविवारी रात्री साडे आठ वाजेच्या सुमारास अचानक झालेल्या वादळी पावसाने जनजीवन विस्कळीत केले. जोरदार वारे आणि पावसाच्या सरींमुळे शहराच्या विविध भागांत झाडे उन्मळून पडण्याच्या, वीज खांब पडल्याच्या तसेच फ्लेक्स बोर्ड उडाल्याच्या घटना घडल्या. शहरात सकाळपासूनच वातावरणात प्रचंड उकाडा होता. दिवसभर उन्हाचा चटका बसल्याने नागरिक हैराण झाले होते. मात्र, रात्री अचानक वातावरणात बदल झाला आणि आकाशात ढग दाटून आले. रात्री साडे आठच्या सुमारास वादळी वाऱ्यासह पावसाने हजेरी लावली. पावसाचा जोर आणि वाऱ्याचा वेग इतका जास्त होता की, अनेक ठिकाणचे फ्लेक्स वाऱ्याने उडून रस्त्यावर आले, तर कोठला परिसरात विजेचा खांब पडला. दरम्यान, श्रीरामपूर तालुक्यातील जाफराबाद, सरला, गोवर्धन, रामपूर गळनिंब, फत्याबाद, उक्कलगाव, बेलापूर खुर्द, बेलापूर बुद्रुक, पढेगाव आदी गावांत वादळीवाऱ्यासह गारपीट झाली.
