प्रतिनिधी | यवतमाळ भावी पिढीला सुसंस्कारित व नैतिक मूल्यांनी परिपूर्ण घडवण्याच्या उद्देशाने श्री दिगंबर जैन मंदिर संस्थान, माळीपुरा येथे श्री कुंद कुंद दिगंबर जैन स्वाध्याय ट्रस्ट, नागपूर यांच्या वतीने २४ ते ३० मे या कालावधीत बाल संस्कार शिबिराचे आयोजन करण्यात आले होते. या शिबिरात १८ विद्यार्थ्यांनी सहभाग नोंदविला. शिबिरात अकोला येथील विद्वान पंडित रोहन घाटे यांचे मार्गदर्शन लाभले. त्यांनी आपल्या मधुर व रोचक शैलीतून णमोकार महामंत्र, इंद्रियज्ञान, सदाचार, आत्मा व परमात्मा आदी विषयांवर सोप्या आणि प्रभावी पद्धतीने विवेचन करून विद्यार्थ्यांना धर्मज्ञान दिले. शिबिरार्थींसाठी दररोज अल्पोपाहाराची व्यवस्था करण्यात आली होती. ३० मे रोजी आयोजित समारोप समारंभाच्या अध्यक्षस्थानी श्री १००८ महावीर दिगंबर जैन मंदिर, वाघापूर येथील विनोद महाजन होते. यावेळी पंडित रोहन घाटे, दिगंबर जैन मंदिराचे अध्यक्ष अशोक रोहणे, उपाध्यक्ष नंदकुमार महाजन, नंदकुमार नेटके यांच्यासह अन्य मान्यवर उपस्थित होते. यावेळी मंदिराचे उपाध्यक्ष नंदकुमार महाजन यांच्या वाढदिवसानिमित्त सर्व विश्वस्तांच्या वतीने पुष्पगुच्छ देऊन त्यांचा सत्कार करण्यात आला. कार्यक्रमाचे संचालन मंदिराचे अध्यक्ष अशोक रोहणे यांनी केले. शिबिर यशस्वी करण्यासाठी उपाध्यक्ष नंदकुमार महाजन, सचिव दिलीप कहाते, सहसचिव दिलीप बाविस्कर, कोषाध्यक्ष विवेक नखाते, आशा महाजन, वृषाली गव्हाणे तसेच इतर पदाधिकारी, श्रावक व श्राविकांनी विशेष परिश्रम घेतले. शेवटी श्री दिगंबर जैन मंदिर संस्थान यांच्या वतीने सर्व श्रावक-श्राविका, शिबिरार्थी आणि पंडित रोहन घाटे यांचे आभार मानण्यात आले. गुणवंत विद्यार्थ्यांचा गौरव परीक्षेत प्रथम, द्वितीय आणि तृतीय क्रमांक मिळविणाऱ्यासह सर्व उत्तीर्ण शिबिरार्थींना प्रमाणपत्रे व बक्षिसे देऊन गौरविण्यात आले. तसेच पंडित रोहन घाटे यांचा शाल व श्रीफळ देऊन सत्कार करण्यात आला.
