बातमी ऐका (Marathi Voice Reader)
येथील एमआयटी कॉलेज ऑफ रेल्वे इंजिनिअरिंग अँड रिसर्च येथे कृत्रिम बुद्धिमत्ता ( एआय) आधारित शिक्षण प्रणाली, अध्यापनातील आधुनिक तंत्रज्ञान आणि भविष्यातील शैक्षणिक संधी याविषयी मार्गदर्शन करण्यासाठी एज्युकेशन समिट ऑन एआय शिक्षण : २०२६ या विशेष कार्यक्रमाचे आयोजन करण्यात आले होते. संस्थेच्या संचालिका प्रा. स्वाती कराड चाटे तसेच संस्थेच्या मार्गदर्शक व मेंटॉर प्रा. प्रभा कासलीवाल यांनी शिक्षण क्षेत्रात कृत्रिम बुद्धिमत्तेच्या प्रभावी वापराचे महत्त्व सुरुवातीला अधोरेखित केले. प्राचार्य डॉ. मधुकर लेंगरे यांनी उपस्थितांना महाविद्यालयाची शैक्षणिक वाटचाल, विविध पदवी व पदविका अभ्यासक्रम, संशोधन उपक्रम, अत्याधुनिक प्रयोगशाळा, प्लेसमेंट सुविधा तसेच विद्यार्थ्यांसाठी उपलब्ध असलेल्या विविध शैक्षणिक संधींची माहिती दिली. व एआय युगात विद्यार्थ्यांनी तंत्रज्ञानाशी सुसंगत कौशल्ये विकसित करण्याचे आवाहन केले. सूत्रसंचालन प्रा. साक्षी पारखे यांनी केले. पहिल्या सत्रात चैतल मगाडे यांनी एम एस ऑफिस मधील एआयचे अनुप्रयोग या विषयावर मार्गदर्शन केले. त्यांनी वर्ड एक्सेल, आणि पावर पॉइंट मध्ये एआयच्या मदतीने काम अधिक जलद, अचूक आणि प्रभावी कसे करता येते याचे प्रात्यक्षिक सादर केले. व शिक्षक, विद्यार्थी आणि प्रशासकीय कर्मचाऱ्यांसाठी एआय आधारित साधनांचा उपयोग कसा होऊ शकतो याची माहिती दिली. दुसऱ्या सत्रात डॉ. प्रमोद रिडे यांनी औद्योगिक क्षेत्रातील एआयचे उपयोग आणि भविष्यातील संधी या विषयावर मार्गदर्शन केले. उत्पादन, ऑटोमेशन, रोबोटिक्स, डेटा विश्लेषण, स्मार्ट उद्योग व्यवस्था आणि रोजगार क्षेत्रातील एआय मुळे होणारे बदल यांचे त्यांनी सविस्तर विश्लेषण केले. भविष्यातील स्पर्धात्मक जगात यशस्वी होण्यासाठी ए आय संबंधित कौशल्ये आत्मसात करण्याची गरज त्यांनी अधोरेखित केली. तिसऱ्या सत्रात प्रा. अजिंक्य लाडे यांनी दैनंदिन अध्यापनातील एआय टूल्स या विषयावर मार्गदर्शन केले. एआयच्या साहाय्याने अध्यापन अधिक आकर्षक, संवादात्मक आणि विद्यार्थी-केंद्रित कसे बनवता येईल याबाबत त्यांनी माहिती दिली. डिजिटल युगात शिक्षकांची भूमिका अधिक प्रभावी बनविण्यासाठी एआय हे सहाय्यक साधन ठरणार असल्याचे त्यांनी नमूद केले. कार्यक्रमाचे नियोजन व समन्वय डॉ. माने यांनी केले. प्रा. व्यंकटेश मुडे यांनी आभार मानले.
