शासनाच्या ‘हिंदूहृदयसम्राट बाळासाहेब ठाकरे स्वच्छ व सुंदर बसस्थानक’ अभियानात चांदूर बाजार आगाराने उल्लेखनीय कामगिरी बजावली असून, विभागात तिसरा क्रमांक प्राप्त केला आहे. महाराष्ट्र राज्य मार्ग परिवहन महामंडळाच्यावतीने ही स्पर्धा राबवण्यात आली होती. या स्पर्धेचा पुरस्कार आगारप्रमुख प्रवीण डायलकर यांनी स्वीकारला. प्रवाशांना स्वच्छ, सुरक्षित आणि आकर्षक सुविधा उपलब्ध करून देण्याच्या उद्देशाने राज्य शासन व महाराष्ट्र राज्य मार्ग परिवहन महामंडळाच्यावतीने हे अभियान राबविण्यात आले होते. अभियानांतर्गत राज्यातील विविध बसस्थानकांची तपासणी करण्यात आली. अमरावती जिल्ह्यातील आठ बसस्थानकांची जिल्ह्याबाहेरील विशेष पथकाद्वारे पाहणी करण्यात आली होती. स्वच्छता, प्रवासी सुविधा, परिसराचे सौंदर्यीकरण, व्यवस्थापन व देखभाल अशा विविध निकषांच्या आधारे गुणांकन करण्यात आले. या स्पर्धेचा निकाल नुकताच जाहीर करण्यात आला असून अमरावती जिल्ह्यातील चार बसस्थानकांनी प्रादेशिक स्तरावर स्थान मिळविले आहे. त्यामध्ये चांदूर बाजार बसस्थानकाने ‘ब’ गटात तृतीय क्रमांक पटकावून जिल्ह्याचा गौरव वाढविला आहे. सोमवारी महाराष्ट्र राज्य मार्ग परिवहन महामंडळाच्या ७८ व्या वर्धापन दिनानिमित्त अमरावती येथील प्रादेशिक कार्यालयात विविध कार्यक्रमांचे आयोजन करण्यात आले होते. यावेळी उत्कृष्ट कामगिरी करणाऱ्या बसस्थानकांचे अधिकारी व कर्मचारी तसेच उल्लेखनीय सेवा बजाविणाऱ्या चालक, वाहक आणि इतर कर्मचाऱ्यांचा सत्कार करण्यात आला. चांदूर बाजार आगाराच्यावतीने आगार प्रमुख प्रवीण डायलकर यांनी हा पुरस्कार स्वीकारला. या पुरस्कारामध्ये प्रशस्तीपत्र, स्मृतिचिन्ह तसेच दीड लाख रुपयांचे रोख पारितोषिक प्रदान करण्यात आले. पुरस्कार मिळाल्याने आगारातील अधिकारी व कर्मचाऱ्यांमध्ये आनंदाचे वातावरण निर्माण झाले आहे.
