बातमी ऐका (Marathi Voice Reader)
पडेगाव परिसरात मुंबई-नाशिक महामार्गावरील रस्ता रुंदीकरणाच्या कामात महावितरणमार्फत अंडरग्राऊंड केबल टाकण्यासाठी करण्यात आलेल्या खोदकामात गंभीर निष्काळजीपणा झाला असून संबंधित कंत्राटदार व अधिकाऱ्यांवर गुन्हा दाखल करावा, अशी मागणी महानगरपालिका शिवसेना – उद्धव बाळासाहेब ठाकरे पक्षाचे गटनेते गणेश लोखंडे यांनी पोलीस आयुक्तांकडे केली. गंभीर प्रश्नाकडे दुर्लक्ष केल्यास उद्धव ठाकरेंच्या शिवसेनेच्या वतीने तीव्र आंदोलन करण्यात येईल, असा इशाराही लोखंडे यांनी दिला आहे. रस्ता पूर्ववत केला नाही पडेगावमध्ये रस्त्याच्या दोन्ही बाजूंनी केबल टाकण्यासाठी मोठ्या प्रमाणात खोदकाम करण्यात आले आहे. मात्र, खोदकामानंतर रस्ता पूर्ववत करण्याचे काम करण्यात आले नाही. त्यामुळे ठिकठिकाणी मोठे खड्डे निर्माण झाले असून विशेषतः रात्रीच्या वेळी वाहनचालकांना त्याचा अंदाज न आल्याने वारंवार अपघात होत आहेत. या अपघातांमध्ये अनेक नागरिक जखमी झाले असून काहींना उपचारासाठी रुग्णालयात दाखल करावे लागल्याचे लोखंडे यांनी म्हटले आहे. समन्वयाअभावी काम रखडले विविध वृत्तपत्रांमधून वारंवार बातम्या प्रसिद्ध होऊनही संबंधित कंत्राटदार तसेच कामावर देखरेख ठेवणाऱ्या अधिकाऱ्यांकडून कोणतीही ठोस कार्यवाही करण्यात आलेली नाही. तसेच पावसाळ्यापूर्वी रस्ता रुंदीकरणाचे काम पूर्ण होणे आवश्यक असताना सार्वजनिक बांधकाम विभाग आणि महावितरण यांच्या समन्वयाअभावी काम रखडले असून यामुळे आगामी पावसाळ्यात नागरिकांच्या अडचणी आणखी वाढण्याची शक्यता असल्याची माहिती गणेश लोखंडे यांनी दिली. फौजदारी कारवाईची मागणी संबंधित कंत्राटदार, कामावर देखरेख करणारे अधिकारी आणि खोदकामास परवानगी देणाऱ्या जबाबदार अधिकाऱ्यांची चौकशी करून त्यांच्यावर फौजदारी कारवाई करावी, अशी मागणी गटनेते गणेश लोखंडे यांनी पोलिस आयुक्तांकडे निवेदनाद्वारे केली आहे. तसेच या गंभीर प्रश्नाकडे दुर्लक्ष केल्यास शिवसेनेच्या वतीने तीव्र आंदोलन करण्यात येईल, असा इशाराही लोखंडे यांनी दिला.
