बातमी ऐका (Marathi Voice Reader)
येथील हिंदू देवालय संस्थेच्या वतीने श्री राम मंदिर रेल्वे कॉलनी येथे अधिक मासानिमित्त आयोजित करण्यात आलेल्या श्रीमद् भागवत कथा ज्ञानयज्ञाला भाविकांचा प्रचंड प्रतिसाद लाभत आहे. पंढरपूर येथील ख्यातनाम कथाकार विनया संकेत कुलकर्णी (उत्पात) यांच्या ओजस्वी आणि अभ्यासपूर्ण वाणीतून या कथेचे रसपान कुर्डुवाडीकरांना घडत आहे. कथेच्या दुसऱ्या दिवशी विविध धार्मिक प्रसंगांचे सुंदर वर्णन करत प्रत्यक्ष नृसिंह अवतार स्टेजवर प्रकट करण्यात आल्याने संपूर्ण वातावरण भक्तीमय झाले होते. कथेच्या दुसऱ्या पुष्पाचे निरूपण करताना विनयाताई कुलकर्णी यांनी सृष्टी वर्णन, कपिलदेव व्याख्यान, ध्रुव चरित्र आणि जडभरत व्याख्यान यावर प्रकाश टाकला. समाजात भक्तीचे महत्त्व सांगताना त्यांनी सात्विक, राजस आणि तामस या भक्तीच्या तीन प्रकारांचे पुराणातील विविध दाखले देऊन सोप्या भाषेत वर्गीकरण केले. तसेच सती अनुसया व अत्री ऋषींची कथा सांगून दत्त अवताराचे महात्म्य आणि पतिव्रता धर्माचे व्याख्यान त्यांनी मांडले. देवाधिदेव महादेव, शची आणि माता पार्वती यांच्या कथेचे निरूपणही त्यांनी अत्यंत रसाळ भाषेत केले. बाळ ध्रुवाच्या कथेचे वर्णन करताना कुलकर्णी यांनी ‘ओम नमो भगवते वासुदेवाय’ या महामंत्राची शक्ती आणि त्याचे मानवी जीवनातील महत्त्व विशद केले. त्यानंतर अजामेळ कथा सांगून भगवान नृसिंह अवताराची कथा सुरू झाली. या कथे दरम्यान प्रत्यक्ष स्टेजवर भगवान नृसिंहांचा अवतार प्रकट करण्यात आला. हा अलौकिक सोहळा डोळ्यात साठवण्यासाठी भाविकांनी गर्दी केली होती. नृसिंह प्राकट्य झाल्यानंतर महाआरती करण्यात आली आणि उपस्थितांना महाप्रसादाचे वाटप करून दुसऱ्या दिवसाच्या कथेची सांगता झाली.
