शहरातील छत्रपती शिवाजी महाराज चौकातील छत्रपती शिवाजी महाराजांच्या पूर्णाकृती पुतळ्याला दुग्धाभिषेक, पूजन आणि महाआरती करून शिवरायांना अभिवादन करण्यात आले. नगराध्यक्ष योगेश पाटील यांच्या हस्ते महाराजांच्या पुतळ्याला दुग्धाभिषेक करण्यात आला. मान्यवरांनी पुष्पहार अर्पण करून अभिवादन केले. छत्रपती शिवाजी महाराज की जय आणि शिवराज्याभिषेक दिन चिरायू हो, अशा घोषणांनी संपूर्ण परिसर दणाणून गेला. मयूर बोरसे, परेश राऊत, विनय आहेर आदींसह प्रमुख कार्यकर्ते व पदाधिकारी उपस्थित होते. डॉ. सुनील बिडगर यांनी शिवराज्याभिषेक दिनाचे ऐतिहासिक महत्त्व उपस्थितांना सांगितले. कार्यक्रमाला विविध राजकीय पक्षांचे पदाधिकारी, सामाजिक संस्थांचे प्रतिनिधी, मराठा समाज बांधव, नगरसेवक, लोकप्रतिनिधी, सामाजिक कार्यकर्ते आणि शिवप्रेमी मोठ्या संख्येने उपस्थित होते. या कार्यक्रमाचे आयोजन सकल मराठा समाजातर्फे करण्यात आले होते. दरम्यान, वंचित बहुजन आघाडी, मनमाड शहराच्या वतीनेही शिवराज्याभिषेक दिन साजरा करण्यात आला. शहराध्यक्ष विलास आहिरे व शहर उपाध्यक्ष सागर गाडे यांच्या हस्ते छत्रपती शिवाजी महाराजांच्या पूर्णाकृती पुतळ्यास पुष्पहार अर्पण करून अभिवादन करण्यात आले. यावेळी पक्षाच्या वतीने कॉ. गोविंद पानसरे लिखित ‘शिवाजी कोण होता’ या पुस्तकाचे वाटप करण्यात आले. याप्रसंगी शहरातील नागरिक मोठ्या संख्येने उपस्थित होते.
