बातमी ऐका (Marathi Voice Reader)
इराण आणि अमेरिका यांच्यातील वाढत्या तणावाचा थेट परिणाम नागपूरच्या डॉ. बाबासाहेब आंबेडकर आंतरराष्ट्रीय विमानतळावर झाला आहे. या जागतिक संकटामुळे नागपूरहून दोहा येथे जाणारी ‘कतार एअरवेज’ आणि शारजाह येथे जाणारी ‘एअर अरेबिया एअरलाईन्स’ यांची विमानसेवा रद्द करण्यात आली आहे. माहिती अधिकार कार्यकर्ते अभय कोलारकर यांनी मिहान इंडिया लिमिटेडकडून मागवलेल्या अधिकृत तपशिलातून ही माहिती समोर आली आहे. १ जानेवारी २०२६ ते १५ मे २०२६ या साडेचार महिन्यांच्या कालावधीत नागपूर विमानतळावरून एकूण १२ लाख २२ हजार ४१३ प्रवाशांनी प्रवास केला. यामध्ये ६ लाख १५ हजार ११६ प्रवासी बाहेरगावी गेले, तर ६ लाख ७ हजार २९७ प्रवासी नागपुरात आले. जानेवारी महिन्यात सर्वाधिक २ लाख ८६ हजार ३०४ प्रवाशांची नोंद झाली, तर मे महिन्याच्या पहिल्या पंधरवड्यात अंदाजे १ लाख ३९ हजार ५९८ प्रवाशांनी प्रवास केला. या साडेचार महिन्यांत मिहान इंडिया लिमिटेडला एकूण ७४.८६ कोटी रुपयांचा महसूल मिळाला आहे. या उत्पन्नामध्ये युझर डेव्हलपमेंट फीचा सर्वाधिक वाटा असून त्यातून ४,४४४.४७ लाख रुपये मिळाले. याशिवाय, एरोनॉटिकल इन्कममधून १,७४३.१३ लाख, नॉन-एरो इन्कममधून १,२०४.८८ लाख आणि कार्गो रॉयल्टीमधून ९३.५० लाख रुपयांची कमाई झाली. कार्गो हबचा विचार करता, १ जानेवारी ते १५ मे २०२६ दरम्यान कार्गो रॉयल्टीमधून एकूण ४.८० कोटी रुपये मिळाले. या काळात नागपुरात १५.४१ मेट्रिक टन माल आयात झाला, तर केवळ १.२३५ मेट्रिक टन माल परदेशात निर्यात करण्यात आला. याच कालावधीत नागपूर विमानतळावर व्हीआयपी आणि खाजगी उड्डाणांची मोठी वर्दळ दिसून आली. साडेचार महिन्यांत एकूण ३६० खासगी विमाने आणि १८३ हेलिकॉप्टर्स नागपूर विमानतळावर उतरली. या खासगी उड्डाणांमधून मिळालेल्या एकूण महसुलाची माहिती वित्त विभागाकडून संकलित केली जात असल्याचे मिहानच्या वरिष्ठ विमानतळ संचालकांनी आरटीआय उत्तरात स्पष्ट केले आहे.
