देशसेवा, शिस्त, नेतृत्व आणि समर्पण यांचे प्रतीक असलेल्या राष्ट्रीय छात्र सेना विभागासाठी अभिमानास्पद अशी कामगिरी महाराजा जिवाजीराव शिंदे महाविद्यालयातील चार कॅडेट्सनी केली. या चारही कॅडेट्सची भारतीय सैन्य दलात, महाविद्यालयाचा राष्ट्रीय कबड्डी खेळाडू तुषार भोसले याची महाराष्ट्र पोलिस दलात निवड झाली. विशेष म्हणजे निवड झालेल्या पाचपैकी तिघे कबड्डी खेळाडू आहेत. सैन्य दलात निवड झालेले सिनिअर अंडर ऑफिसर करण राणेरजपूत, ज्युनियर अंडर ऑफिसर स्वप्निल जामदार, कॅडेट अर्जुन धोत्रे आणि कॅडेट साहिल ससाणे तसेच पोलीि दलात निवड झालेला तुषार भोसले यांचा गौरव प्राचार्य डॉ. प्रकाश साळवे, वाणिज्य विभाग प्रमुख डॉ. रावसाहेब काळे, उपप्राचार्य प्रा. श्रीकांत थोरात व पर्यवेक्षक रत्नाकर झिटे यांच्या हस्ते करण्यात आला. प्राचार्य डॉ. प्रकाश साळवे म्हणाले, भारतीय सैन्य दलात सेवा करण्याची संधी ही केवळ नोकरी नसून राष्ट्रसेवेचे सर्वोच्च कर्तव्य आहे. एनसीसी विद्यार्थ्यांमध्ये शिस्त, नेतृत्व, आत्मविश्वास आणि देशभक्तीची मूल्ये रुजवते. महाविद्यालयातील विद्यार्थ्यांनी या यशस्वी कॅडेट्सचा आदर्श घ्यावा. आज या पाच विद्यार्थ्यांनी मिळवलेले यश हे संपूर्ण महाविद्यालयासाठी प्रेरणादायी असून भविष्यात आणखी विद्यार्थी सैन्य, पोलिस व स्पर्धा परीक्षांत यश मिळवतील. सूत्रसंचालन कॅडेट अनुराधा शिंदे हिने, तर आभार डॉ. किरण ढवळे यांनी मानले.
