औंढा नागनाथ तालु्क्यातील येडूद येथे धोंडे जेवणासाठी गेलेल्या जावयाला चुलत मेहुण्यांनी काठीने मारहाण केल्याची घटना घडली आहे. या प्रकरणी औंढा नागनाथ पोलिस ठाण्यात सोमवारी ता. 8 गुन्हा दाखल झाला आहे. सध्या अधिक मास सुरू असल्याने जावयांना धोंडे जेवण देण्यासाठी सासरवाडीकडून निमंत्रण देऊन बोलावण्याची परंपरा आहे. यामध्ये धोंडे जेवणासोबतच कपड्यांचे आहेर या शिवाय आपापल्या कुवतीनुसार सोन्याचा दागिना देखील दिला जातो. तीन वर्षातून एकदा अधिक मास येत असल्याने या महिन्यात जावयांची सासुरवाडीकडून मोठी सरबराई होते. दरम्यान, हिंगोली येथील लखन बापुराव दाढेल यांनाही त्यांच्या सासुरवाडीकडून धोंडे जेवणाचे निमंत्रण देण्यात आले होते. त्यानुसार रविवारी ता. ७ त्यांच्या सासुरवाडीला येडूद येथे गेले होते. सायंकाळी 6 वाजेच्या सुमारास ते सासुरवाडीत घरासमोर उभे असतांना त्यांचे चुलत मेहुणे बळीराम पोऊळकर व राजू पोऊळकर हे तेथे आले. तु “आमच्या गावी का आला?” असे विचारत जुन्या वादाची कुरापत काढली. यावेळी शाब्दीक चकमकीनंतर वाद वाढत गेल्याने दोघांनी संगनमत करून लखन यांना शिवीगाळ करून लाकडी काठीने तसेच लाथाबुक्क्यांनी बेदम मारहाण केली. इतकेच नव्हे तर त्यांना जिवे मारण्याची धमकीही देण्यात आली. या माराहाणीत लखन हे जखमी झाले. या घटनेनंतर लखन दाढेल यांनी सोमवारी ता. 8 औंढा नागनाथ पोलीस ठाण्यात तक्रार दिली. त्यांच्या तक्रारीवरून पोलिसांनी बळीराम पोऊळकर, राजू पोऊळकर यांच्यावर गुन्हा दाखल झाला आहे. पोलिस उपनिरीक्षक शेख खुद्दूस, सहाय्यक पोलिस उपनिरीक्षक विश्वनाथ मुकाडे पुढील तपास करीत आहेत.
