बातमी ऐका (Marathi Voice Reader)
महाराष्ट्र राज्य मार्ग परिवहन महामंडळाच्या उत्पन्नावर परिणाम करणाऱ्या तसेच प्रवाशांच्या सुरक्षिततेला धोका निर्माण करणाऱ्या अवैध प्रवासी वाहतुकीविरोधात एरंडोल आगाराने विशेष मोहीम हाती घेतली आहे. मा. परिवहन मंत्री प्रताप सरनाईक यांच्या निर्देशानुसार व शासनाच्या धोरणानुसार बसस्थानक परिसरातील २०० मीटर “नो-पार्किंग झोन” ची प्रभावी अंमलबजावणी करण्यात येत आहे. उच्च न्यायालयाच्या आदेशानुसार बसस्थानक परिसरातील २०० मीटर अंतरात कोणत्याही प्रकारची अवैध प्रवासी वाहतूक अथवा प्रवासी उचलण्यासाठी वाहने उभी करण्यास मनाई आहे. अवैध प्रवासी वाहतुकीमुळे राज्य परिवहन महामंडळाच्या प्रवासी संख्येत घट होण्याबरोबरच वाहतूक कोंडी, अपघातांचे वाढते प्रमाण आणि नियमबाह्य माल वाहतुकीस प्रोत्साहन मिळत असल्याची बाब प्रशासनाच्या निदर्शनास आली आहे. त्यामुळे ही मोहीम सातत्याने राबवण्यात येणार आहे.
