बातमी ऐका (Marathi Voice Reader)
अजित पवारांच्या अपघाती निधनानंतर साडेचार महिने जाहीर वक्तव्ये टाळणाऱ्या उपमुख्यमंत्री सुनेत्रा पवारांनी गुरुवारी कडक पवित्रा घेतला. राष्ट्रवादी अजित पवार गटाच्या २७ व्या वर्धापन दिन सोहळ्यात राष्ट्रीय अध्यक्षाच्या भूमिकेतून स्वपक्षीय नेत्यांना उद्देशून त्या म्हणाल्या की, पक्षहितासाठी ‘दादां’सारखेच कठोर निर्णय घेण्यास मला अजिबात जड जाणार नाही. अजितदादांनी हयातीत सर्वांचे हट्ट पुरवले, पदं दिली; पण यापुढे पक्षाची बदनामी सहन करणार नाही. भाजप तसेच रोहित पवारांचे नाव घेणे टाळत त्यांनी ‘पक्षात कुणाचाही अनावश्यक हस्तक्षेप सहन करणार नाही’ असाही इशारा दिला. तर १९९९ मध्ये भाजपचे ज्येष्ठ नेते प्रमोद महाजनांच्या आग्रहामुळे सहा महिने आधीच विधानसभा निवडणूक झाली. म्हणून राष्ट्रवादीचा मुख्यमंत्री होण्याची संधी हुकली असा दावा छगन भुजबळ यांनी केला. मेळाव्यात भुजबळ आणि प्रदेशाध्यक्ष सुनील तटकरेंमध्ये जुगलबंदीही झाली. पक्षाची वाटचाल स्पष्ट करताना सुनेत्रा पवार म्हणाल्या की, आगामी महामंडळ नियुक्त्यांमध्ये केवळ ज्येष्ठता न पाहता पात्रता, पक्षनिष्ठा आणि समर्पणालाच संधी दिली जाईल. पक्षविस्तारासाठी बाहेरील नेत्यांना प्रवेश देताना काही तडजोडी कराव्या लागल्या, तरी मूळ निष्ठावंत कार्यकर्त्यांचा सन्मान राखला जाईल. सुनेत्रा पवारांचा रोख कुणाकडे आणि का? भाजप : लोकसभा, विधानसभेला तसेच नुकत्याच झालेल्या राज्यसभा निवडणुकीत राष्ट्रवादीचे उमेदवार ठरवण्यात भाजपने हस्तक्षेप केला. शरद पवार उमेदवार असतील तर राज्यसभेला महायुतीचा उमेदवार नसेल, असे भाजपने परस्परच जाहीर केले होते. रोहित पवार : रोहित पवार सातत्याने अजित पवार गटाला टार्गेट करत आहेत. अप्रत्यक्षपणे सुनेत्रा पवार, पार्थ आणि जय यांच्यावर टीका करत आहेत. बारामती मतदारसंघातही हस्तक्षेप करत आहेत. नरहरी झिरवाळ : अन्न व औषधी प्रशासन मंत्रिपदावर ठसा उमटवता आला नाही. त्यांच्या लाच आणि अश्लील व्हिडिओमुळे पक्षाची प्रतिमा मलिन झाली. पटेल, भुजबळ, तटकरे : तिघेही ज्येष्ठ नेते पक्षावर ताबा घेण्याचा प्रयत्न करत आहेत. छगन भुजबळ-तटकरेंनी राज्यसभेवरून जाहीरपणे वादावादी केली. सुनील टिंगरे : विधान परिषद निवडणुकीत सुनेत्रा पवार, पार्थ पवार यांनी विक्रम काकडेंची उमेदवारी जाहीर केल्यावर सुनील टिंगरेंनी त्याला आव्हान दिले. दोन वर्षांपू्र्वी पुण्यातील पोर्शे कार अपघात प्रकरणात टिंगरे यांचे नाव आले होते. भुजबळ कबड्डीपटू, ते घेरून बाद करतात : सुनील तटकरे सुनील तटकरे म्हणाले की, भुजबळ उत्तम कबड्डीपटू आहेत. कबड्डीत समोरच्याला घेरून बाद करण्याची आणि लाइन क्रॉस करण्याची जी रणनीती असते, तीच भुजबळांनी त्यांच्या राजकीय प्रवासात आजवर वापरली आहे. खेळात राजकारण, राजकारणाचा खेळ करू नका : छगन भुजबळ प्रदेशाध्यक्ष सुनील तटकरेंच्या रणनीतीमुळे राज्यसभेची संधी हुकल्याची खंत अप्रत्यक्षपणे व्यक्त करत छगन भुजबळ म्हणाले की, “खेळात राजकारण आणू नका आणि राजकारणाचा खेळ करू नका; पक्षापेक्षा कुणीही मोठा नाही.’
