बातमी ऐका (Marathi Voice Reader)
प्रधानमंत्री आवास योजनेअंतर्गत मंजूर झालेल्या घरकुलांच्या रखडलेल्या हप्त्यांचा प्रश्न अखेर रस्त्यावर आला आहे. संतप्त लाभार्थ्यांनी शिवसेना उबाठा गटाच्या नेतृत्वाखाली पंचायत समिती कार्यालयात ठिय्या आंदोलन छेडले. बुधवार, दि. १० जून रोजी झालेल्या आंदोलनादरम्यान लाभार्थी आणि शिवसैनिकांनी गटविकास अधिकाऱ्यांच्या दालनासमोरच झुणका-भाकर खाऊन प्रशासनाच्या निष्क्रियतेचा निषेध नोंदवला. यापूर्वी दि. ३ जून रोजी (उबाठा) पक्षाच्या वतीने गटविकास अधिकाऱ्यांना निवेदन देऊन घरकुल लाभार्थ्यांचे रखडलेले हप्ते तातडीने जमा करण्याची मागणी करण्यात आली होती. मात्र कोणतीही ठोस कार्यवाही न झाल्याने लाभार्थ्यांमध्ये तीव्र नाराजी निर्माण झाली. प्रशासनाचे लक्ष वेधण्यासाठी आंदोलनाचा मार्ग स्वीकारला. या आहेत प्रमुख मागण्या तालुक्यातील अनेक लाभार्थ्यांनी शासनाच्या सूचनेनुसार घरकुल बांधकामाला सुरुवात केली. काहींनी स्वतःच्या खिशातून कर्ज काढून किंवा उसनवारी करून काम पुढे नेले. मात्र मंजूर झालेले हप्ते वेळेवर न मिळाल्याने अनेकांची घरे अर्धवट अवस्थेत आहेत. काही लाभार्थ्यांना पावसाळ्यापूर्वी घर पूर्ण करण्याची अपेक्षा होती; परंतु निधीअभावी बांधकामे ठप्प झाली आहेत. आंदोलनादरम्यान लाभार्थ्यांनी शासन, प्रशासनाविरोधात जोरदार घोषणाबाजी करत रखडलेले हप्ते वितरित करण्याची मागणी केली.
