बातमी ऐका (Marathi Voice Reader)
नुकत्याच नागपूर येथे झालेल्या ”सेपक टकरॉ राज्य अजिंक्यपद स्पर्धेत” अमरावती जिल्हा मुलींच्या संघातील खेळाडूंनी यंदाची ज्युनिअर व सिनियर स्पर्धा जोरदार खेळाद्वारे गाजवली. प्रचंड गर्मी आणि समोर बलाढ्य संघ असूनही, अमरावतीच्या स्टार सेपक टकरॉ खेळाडूंनी अद्वितीय खेळ सादर करत राज्यात उपविजेतेपद पटकावले. मुलींच्या ज्युनिअर संघाने लीग सामन्यांमध्ये नाशिक, भंडारा आणि यवतमाळ संघांचा धुव्वा उडवला. त्यानंतर उपांत्यपूर्व सामन्यात नांदेडचा, तर उपांत्य सामन्यात वर्धा संघाचा दणदणीत पराभव करून अंतिम फेरीत धडक मारली. अंतिम सामन्यात सोलापूरकडून पराभव पत्करावा लागल्याने संघाला उपविजेतेपदावर समाधान मानावे लागले.सिनियर मुलींच्या संघाने पहिल्याच सामन्यात बलाढ्य नांदेड संघाचा पराभव करून सर्वांना धक्का दिला. पुढे वाशीम आणि यवतमाळ संघांना पराभूत करत अंतिम सामन्यात सोलापूर संघाला अटीतटीची लढत दिली व उपविजेतेपद मिळवले. मिक्स इव्हेंटमध्ये बलाढ्य नाशिक संघाचा पराभव करत अमरावतीने अंतिम फेरीत सोलापूरला टक्कर दिली व उपविजेतेपद (रजत पदक) पटकावले. ”रेगु इव्हेंट”मध्येही उत्कृष्ट खेळ करत तृतीय स्थान व रजत पदक पटकावले. अमरावतीच्या या ऐतिहासिक यशाबद्दल मुख्याध्यापिका अर्चना लुंगे, जिल्हा सेपक टकरा असोसिएशनचे उपाध्यक्ष डॉ. सुगंध बंड, डॉ. हरीश काळे, आनंद उईके, अतुल पडोळे, हेमंत देशमुख, तेजस कातखेडे, प्रफुल गाभने यांच्यासह सर्व क्रीडाप्रेमी व पालकांनी खेळाडूंचे मनःपूर्वक अभिनंदन केले आहे.यशस्वी संघात राष्ट्रीय खेळाडू भक्ती चौधरी, अंशिका दिवाण, श्रावणी लोणारे, आयुषी दिवाण, जेसिका काळे, आकांक्षा ठोके, अंजली राठोड, अक्षरा तायवाडे, नैन्सी जैस्वाल, आरती मरस्कोल्हे, आदिश्री पडोळे, परीधी तिडके, आनंदी राऊत, वैष्णवी जीवतोडे, आरुषी शिंगाडे, गौरी जोहारे, संज्योत चिपडे आणि पूर्वी बिहान या खेळाडूंचा समावेश होता. नियमित सराव हेच यशाचे गमक ः मुलींचा हा संघ जिल्हा सेपक टकरा असोसिएशनचे अध्यक्ष शिवछत्रपती पुरस्कार विजेते प्राचार्य व मुख्य प्रशिक्षक डॉ. हनुमंत लुंगे यांच्या मार्गदर्शनाखाली वर्षभर नियमित सराव करतो. कडक उन्हातही घेतलेले अथक परिश्रम आणि नियमित सराव हेच या दोन्ही संघांच्या देदीप्यमान यशाचे मुख्य गमक ठरले आहे. विशेष बाब अशी की, बहुतेक खेळाडू या कस्तुरबा कन्या शाळेच्या विद्यार्थिनी आहेत.
