मोर्शी येथील उपजिल्हा रुग्णालय, वरुड ग्रामीण रुग्णालयाचे वैद्यकीय अधीक्षक डॉ. प्रमोद पोतदार यांचा खासदार सुप्रिया सुळे यांच्या हस्ते सत्कार केला. या वेळी खासदार अमर काळे, खासदार बळवंतराव वानखडे, माजी गृहमंत्री अनिल देशमुख, विदर्भ साहित्य संघाचे अध्यक्ष डॉ.गिरीश गांधी, मोर्शीच्या नगराध्यक्षा प्रतीक्षा गुल्हाने, उपाध्यक्ष डॉ. प्रदीप कुऱ्हाडे, डॉ. प्रवीण चौधरी आदी मान्यवर प्रमुख अतिथी म्हणून उपस्थित होते. श्री शिवाजी शिक्षण संस्थेचे अध्यक्ष, माजी कृषिमंत्री हर्षवर्धन देशमुख यांच्या ७५ व्या अमृत महोत्सवी वर्षाच्या निमित्ताने येथे विशेष कार्यक्रम घेतला. त्यासाठी खासदार सुप्रिया सुळे व इतर मान्यवर एकत्र आले होते. याच कार्यक्रमात डॉ.प्रमोद पोतदार यांचा सत्कार केला. त्यांच्या कार्यकाळात मोर्शी व वरुड रुग्णालयाचा कायापालट झाला असून, त्यासाठी शासनाने पुरस्कार देऊन त्यांना गौरवान्वीतही केले. त्याच क्रमात आता खासदार सुप्रिया सुळे यांनीही डॉ. पोतदार यांना दोन चषक, शाल, श्रीफळ व पुष्पगुच्छ देऊन त्यांचा सत्कार केला.डॉ. पोतदार यांच्यामुळे मोर्शीच्या उपजिल्हा रुग्णालयाला राज्यस्तरीय एकत्रित महात्मा फुले जनआरोग्य योजना व प्रधानमंत्री जन आरोग्य योजनेअंतर्गत जिल्हाधिकारी यांच्या हस्ते पुरस्कार प्रदान केला. याशिवाय याच रुग्णालयाला राष्ट्रीय कायाकल्प योजनेद्वारे राज्यातून दहा लाखाचा द्वितीय पुरस्कारही प्राप्त झाला. तिकडे वरुड ग्रामीण रुग्णालयाला वंदनीय बाळासाहेब ठाकरे आरोग्य रत्न पुरस्कार, डॉ. आनंदीबाई गौरव पुरस्कार, राष्ट्रीय बाल स्वास्थ कार्यक्रमात जिल्हास्तरीय प्रथम पुरस्कार प्राप्त झाला आहे. या वेळी राष्ट्रवादी काँग्रेस पक्षाचे (शरद पवार) पदाधिकारी-कार्यकर्ते उपस्थित होते.
