मंगळवेढ्यात 10.87 लाखांचा भेसळयुक्त खताचा साठा जप्त:कृषी विभागाने टाकलेल्या छाप्यात कारवाई

पाटखळ येथे कृषी विभागाने टाकलेल्या छाप्यात तब्बल १० लाख ८७ हजार ५७५ रुपयांचा भेसळयुक्त रासायनिक खतांचा साठा जप्त करण्यात आला. या प्रकरणी प्रहार उद्योग समूह व कृषी केंद्र चालक सतीश मनोहर भोसले (रा. पाटखळ, ता. मंगळवेढा) व अवधूत अॅग्रो इंडस्ट्रीज इंडिया प्रा. लि. या खत उत्पादक कंपनीचा संचालक रविराज शंकर कणसे (रा. सातारा) यांच्यावर गुन्हा दाखल झाला आहे. पाटखळ- मंगळवेढा मार्गावरील पेट्रोल पंपाजवळील प्रहार उद्योग समूह व कृषी केंद्रावर कृषी विभागाच्या पथकाने ८ जून रोजी सायंकाळी अचानक तपासणी केली. दुकान व गोदामाची पाहणी करताना अनेक गंभीर अनियमितता व त्रुटी आढळून आली. संबंधित विक्रेत्याकडे विक्री परवान्यात नमूद नसलेल्या कंपनीची खते आढळून आली. खतसाठा अनधिकृत गोदामात ठेवला होता. साठा नोंदवही अद्ययावत नव्हती. खत साठा फलक व दरसूची प्रदर्शित करण्यात आली नव्हती. खत विक्रीच्या एम-फॉर्म बिलाच्या प्रती उपलब्ध नव्हत्या. ई-पॉस मशीनही उपलब्ध नसल्याचे निदर्शनास आले. विविध खतांचा साठा जप्त तपासणी दरम्यान अवधूत अॅग्रो इंडस्ट्रीज इंडिया प्रा. लि., सातारा या कंपनीच्या नावावरील अमोनियम सल्फेट, वॉटर सोल्युबल खतांचे विविध प्रकार, फॉस्फरिक अॅसिड, झिंक सल्फेट, कॉम्बी किट यासह विविध रासायनिक खतांचा १० लाख ४६ हजार ७८० रुपयांचा साठा जप्त केला. याशिवाय अन्य कंपन्यांची सुमारे ४० हजार ७९५ रुपयांची खते देखील मिळाली. तपासणी दरम्यान परवाना क्रमांकात तफावत आढळून आली. संबंधित कंपनीच्या संचालकाच्या विक्री परवान्याचा क्रमांक व प्रत्यक्ष खतांच्या पोत्यांवर छापलेला परवाना क्रमांक यामध्ये तफावत आढळली. आयात केलेल्या कच्च्या मालाची आवश्यक बिले सादर करण्यात संचालक अपयशी ठरल्याचे फिर्यादीत नमूद आहे. अमोनियम सल्फेट, वॉटर सोल्युबल खतांचे नमुने सीलबंद करुन तपासणीसाठी पुण्यातील खत विश्लेषण प्रयोग शाळेला पाठवले. जप्त साठा इतरत्र हलवण्यास अथवा विक्री करण्यास प्रतिबंध घालण्यात आला. खत नियंत्रण आदेश १९८५ मधील तरतुदीनुसार कृषी केंद्राला विक्री परवाना निलंबित केला आहे.