बातमी ऐका (Marathi Voice Reader)
महाराष्ट्रातील लाखो भाविकांचे श्रद्धास्थान असलेल्या खंडोबादेवाच्या सासुरवाडी नेवासा बुद्रुक येथे अधिक मासानिमित्त एक आगळावेगळा धार्मिक उपक्रम पार पडला. पुरातन म्हाळसा-खंडोबा-बाणाई मंदिरात आयोजित धोंड्याच्या कार्यक्रमात खंडेरायांना धोंड्यासह पंचपक्वान्न मिष्टान्नाचा नैवेद्य अर्पण करण्यात आला. तसेच नेवासा बुद्रुक तीर्थक्षेत्रातील उपस्थित १६ जावयांचा विशेष सत्कार करून त्यांच्या हस्ते धोंड्याची पूजा करण्यात आली. पुरातन म्हाळसा-खंडोबा-बाणाई मंदिर जीर्णोद्धार समितीचे अध्यक्ष संभाजी ठाणगे यांच्या नेतृत्वाखाली व ग्रामस्थांच्या सहकार्याने हा अभिनव उपक्रम आयोजित करण्यात आला. कार्यक्रमाचे निमंत्रण थेट जेजुरी येथे जाऊन खंडेरायांना अर्पण करण्यात आले होते. तसेच मालेगाव (चंदनपुरी) येथील बाणाई देवस्थानालाही निमंत्रण देण्यात आले होते. यावेळी संभाजी ठाणगे, संगीताताई ठाणगे, राजेंद्र काशीद व आशाताई काशीद यांच्या हस्ते खंडोबारायांना धोंड्यासह पंचपक्वान्न मिष्टान्नाचा भोग अर्पण करण्यात आला. खंडेरायांना धोतर, शर्ट, टोपी तर म्हाळसादेवी व बाणाई मातेला साडी-चोळी अर्पण करून भक्तिभावाने पूजा करण्यात आली. कार्यक्रमात खरवंडी येथील वाघे सचिन शिंदे व त्यांच्या जागरण-गोंधळ पथकाने खंडेरायांची पारंपरिक गीते सादर करून वातावरण भक्तिमय केले. खंडोबा भक्त व लेखक मार्तंड वाळके यांनी म्हाळसा-खंडोबाचा महिमा कथन करत उपस्थितांना धार्मिक परंपरांचे महत्त्व सांगितले. यावेळी कोंडीराम महाराज पेचे, बदाम महाराज पठाडे, श्रीधर महाराज अनुभुले, नेवासा कृषी उत्पन्न बाजार समितीचे सभापती नंदकुमार पाटील, नगराध्यक्ष डॉ. करणसिंह घुले, नेवासे प्रेस क्लबचे अध्यक्ष गुरुप्रसाद देशपांडे, उद्योजक बाळासाहेब मारकळी, अनिल हापसे, राजेंद्र काशीद, बाळू फसले, पोलीस पाटील दिलीप गायकवाड, प्रकाश उंडे, रविंद्र मुसमाडे, रविंद्र उसारे, सोमनाथ मरगळ, शांताराम बोर्डे, प्रकाश गुंडे, भजन जाधव, भास्कर कणगरे, अॅड. ब्राम्हणे, संदीप आलवणे, शंकर महाजन व गोरख शेंडे यांच्या हस्ते तळीभंडार व महाआरती करण्यात आली. धोंड्याच्या कार्यक्रमानिमित्त इंदोर येथील खंडोबा भक्त मुक्ताजी काटे व सुशीलाबाई मुक्ताजी काटे यांनी मंदिरास भेट दिली. मंदिराच्या जीर्णोद्धार व अन्नदान कार्यासाठी त्यांनी दिलेल्या योगदानाबद्दल त्यांचा गौरव करण्यात आला. नगराध्यक्ष डॉ. करणसिंह घुले यांच्यावतीने मंदिर जीर्णोद्धार समितीच्या उत्कृष्ट कार्याचा सन्मानपत्र देऊन गौरव करण्यात आला. यावेळी उपस्थित हजारो भाविकांना धोंड्याच्या निमित्ताने मिष्टान्न भोजनाचा प्रसाद देण्यात आला. पत्रकार सुधीर चव्हाण यांनी सूत्रसंचालन केले.
