बातमी ऐका (Marathi Voice Reader)
गावात पिण्याचे पाणी नाही, अन् मागणी करुनही सरकार लक्ष देत नाही, अशी स्थिती असताना मेळघाटातील बोरधा (ता. चिखलदरा) गावच्या रहिवाशांनी प्रशासकीय अनास्थेच्या डोळ्यात अंजन घालणारे उदाहरण वास्तवात उतरवले. या गावातील ११० कुुटुंबांनी प्रत्येकी अडीच हजार याप्रमाणे २ लाख ७५ हजार गोळा करुन बोअरवेल तयार केली. बोरधाची लोकसंख्या ५५० आहे. या गावाची गट ग्रामपंचायत राहू आहे. बोअरवेल करण्यासाठी येथे बैठक घेतली नाही. गावातील चार-पाच तरुणांनी रात्री एकत्र बसून, या समस्ये विषयी चर्चा केली. वेगवेगळे उपाय शोधताना त्यांनी बोअरवेलच्या पर्यायावर शिक्कामोर्तब केले. दुसऱ्या दिवशी त्यासाठीचा एकूण खर्च संबंधित खासगी यंत्रणेकडून मागवला आणि ही माहिती प्रत्येक घरी पोहोचवली. विशेष असे की गावातील प्रत्येक कुटुंबाने या तरुणांच्या प्रस्तावावर विश्वास दर्शवून रक्कम गोळा करण्यासाठी मदत केली. आठ दिवसांत पैसेही गोळा झाले. गावात पाणी कुठे लागेल,याचा शोध घेण्यासाठी पुढे मध्यप्रदेश येथील एका कंपनीची मदत घेतली गेली. गावात आणून ठेवलेल्या कृत्रिम पाण्याच्या टाकीजवळ हॅण्डपंप आहे. परंतु त्यात पाणी येत नाही. म्हणजेच ती जागा सोडून गावातील दुसऱ्या जागेचा शोध घेतला. बोअर करताना तब्बल साडे सहाशे फूट खोल खड्डा करावा लागला. तेथे पाण्याचा स्त्रोत असल्याचे बोअर वाल्याकडून सांगण्यात आले. मुळात गावकऱ्यांनी गोळा केलेल्या रकमेत हे होणे शक्य नव्हते. त्यामुळे अतिरिक्त शंभर फूट पाइपचे पैसे वेगळे लागतील असे त्यांच्याकडून सांगण्यात आले. त्यातून मध्यम मार्ग काढत खालच्या शंभर फुटाचे केसींग (प्लॉस्टीक पाइपचे आवरण) थांबवण्यात आले. परिणामी पाणी थोडे कमी दाबाने प्राप्त होत आहे. पण गाववासी या प्रयोगावर खूष आहेत. कारण पूर्वी पाणी आणण्याकरिता गावाच्या बाहेर एक ते दीड किलोमीटर अंतरावर जावे लागत होते. पाण्यासाठी यांनी घेतला पुढाकार बोअरवेलसाठी पुढाकार घेतलेल्यांमध्ये मुंगा धिकार, सोमा कासदेकर, चंदू धिकार, डाबली धिकार, राजेश कासदेकर, झुले धिकार, प्रतिराम चिमोटे, नंदराम धिकार, रेखा कासदेकर, प्रमिला कासदेकर, टुमली धिकार, शांती कासदेकर व इतरांचा समावेश आहे.
