बातमी ऐका (Marathi Voice Reader)
गेल्या ४० वर्षांत पहिल्यांदाच अमरावती येथील धन्वंतरी सहकारी रुग्णालय सहकारी संस्थेची (दसरा मैदानजवळ, बडनेरा रोड) निवडणूक पार पडली. सोमवारी दुपारी या निवडणुकीचा निकाल घोषित करण्यात आला. १७ मे रोजी झालेल्या मतदानात ३ हजार १७१ मतदारांपैकी १ हजार ३३८ (४२.१९ टक्के) मतदारांनी आपला हक्क बजावला होता. कॅम्प परिसरातील आशीर्वाद मंगल कार्यालयात सोमवारी सकाळी ९ वाजता मतमोजणीला सुरुवात झाली. सुमारे तीन तासांत सर्व निकाल जाहीर झाले. धन्वंतरी सहकारी रुग्णालय सहकारी संस्थेचे संचालक मंडळ २१ सदस्यीय आहे. यात सर्वसाधारण मतदारसंघातून १३, सहकारी संस्था मतदारसंघातून ३, महिलांसाठी राखीव २, तर एससी-एसटी, ओबीसी आणि विमुक्त व भटक्या जमाती (व्हीजे-एनटी) मतदारसंघातून प्रत्येकी एका प्रतिनिधीची निवड करण्यात आली. विजयी उमेदवारांमध्ये सर्वसाधारण मतदारसंघातून डॉ. प्रमोद झाडे (७३२ मते), अजय दातेराव (७१३), अशोक ठाकरे (६७५), ओंकारराव बंड (६५२), प्रतापराव भुयार (६४७), राजेश गोयनका (६४१) आणि गजाननराव रडके (६२६) यांचा समावेश आहे. सहकारी संस्था मतदारसंघातून प्राचार्य प्रकाश काळबांडे (१४७), मनीष कोरपे (१६१) आणि संजय वानखडे-मार्डीकर (१४९) विजयी झाले. ओबीसी मतदारसंघातून अमित गावंडे (७८७), एससी-एसटी मतदारसंघातून प्राचार्य डॉ. संजय खडसे (७५१) आणि विमुक्त व भटक्या जमाती मतदारसंघातून अरुण बांबल (८४२) यांनी विजय मिळवला. महिलांसाठी राखीव मतदारसंघातून मिनल देशमुख (८०६) आणि वंदना वानखडे (७३१) विजयी झाल्या. सहायक जिल्हा उपनिबंधक सुधीर खंबायत यांनी निवडणूक निर्णय अधिकारी म्हणून काम पाहिले, त्यांना सहकार विभागातील अधिकारी-कर्मचाऱ्यांनी सहकार्य केले. दरम्यान, या निवडणुकीत सहा जागांसाठी जुनेच सूत्र कायम राहिले. नेहमीप्रमाणे ही निवडणूक अविरोध व्हावी, यासाठी प्रयत्न झाले होते, परंतु ते पूर्णतः यशस्वी झाले नाहीत. केवळ सर्वसाधारण मतदारसंघातील वैद्यकीय सक्षम उमेदवारांपुरतेच हे प्रयत्न मर्यादित राहिले. त्यामुळे डॉक्टरांचा मतदारसंघ म्हणून ओळखल्या जाणाऱ्या सहा जागांसाठी एकेकच उमेदवारी अर्ज दाखल झाल्याने मनोज गुप्ता, ओ. जी. मुंधडा, अनिल रोहणकर, अविनाश लव्हाळे, स्वप्नील शिरभाते आणि आशिष साबू हे सहा वैद्यकीय व्यावसायिक अविरोध विजयी झाले.
