बातमी ऐका (Marathi Voice Reader)
पूर्ववैमनस्यातून एका तरुणाची डोळ्यात मिरची पूड टाकून चाकूने हल्ला चढवत हत्या करण्यात आली. ही घटना शनिवारी २० रात्री साडेदहा ते अकरा वाजताच्या सुमारास बडनेरा येथे भगतसिंग चौकात घडली. या प्रकरणी मृतकाच्या आईने दिलेल्या तक्रारीवरून तिघांविरुद्ध खुनाचा गुन्हा दाखल केला. घटनेनंतर काही तासांतच या प्रकरणातील दोन आरोपींना अटक केली. याचवेळी एका अल्पवयीनाला ताब्यात घेतले. ओम आशिष कैथवास (२३, रा. माताफैल, जुनी वस्ती, बडनेरा) असे मृतक तरुणाचे नाव आहे. तर रोशन धनराज कैथवास (१९, रा. भगतसिंग चौक, जुनी वस्ती, बडनेरा) व संकेत विनोद कैथवास (२०, रा. माताफैल, जुनी वस्ती, बडनेरा) अशी अटक करण्यात आलेल्या मारेकऱ्यांची नावे आहेत. शनिवारी रात्री ओम कैथवास हा दुचाकीने भगतसिंग चौकातून जात होता. लग्नात नातेवाइकांसमोर मारहाण केल्याचा काढला वचपा मारेकरी व मृतक तरुण हे दोघेही एकमेकांच्या नात्यात आहे. सुमारे आठ ते दहा महिन्यांपुर्वी एका लग्नात डिजे वाजवण्याच्या कारणावरुन ओम व रोषण, संकेत यांच्यात वाद झाला होता. त्यावेळी लग्नातील नातेवाईकांसमक्ष ओमने आपल्याला मारहाण केली होती, असे संकेत व रोषणने सांगितले असून त्याच वादाचा वचपा काढण्यासाठी खून केल्याचे ते सांगत असल्याची माहीती बडनेराचे ठाणेदार हनुमंत उरलागोंडावर यांनी दिली आहे.
