जिल्हाध्यक्ष भरत पिसे यांच्या निलंबनाचा जाहीर निषेध; मागण्या मान्य न झाल्यास कामबंद आंदोलनाचा इशारा
सुरेश पाचभाई मारेगाव
मारेगाव:- विदर्भ पटवारी संघ नागपूर, जिल्हा शाखा यवतमाळ अंतर्गत उपविभाग शाखा वणीच्या वतीने सोमवारी (दि. २२ जून) वणी व मारेगाव येथे काळ्याफिती लावून एकदिवसीय धरणे आंदोलन करण्यात आले.
विदर्भ पटवारी संघाचे जिल्हाध्यक्ष भरत पिसे यांच्यासह नेर तालुक्यातील चार ग्राम महसूल अधिकाऱ्यांवरील निलंबन कारवाईचा निषेध करण्यासाठी हे आंदोलन करण्यात आले.मारेगाव येथील तहसील कार्यालयासमोर तसेच वणी येथे मोठ्या संख्येने ग्राम महसूल अधिकारी सहभागी झाले होते.
आंदोलनादरम्यान कर्मचाऱ्यांनी हाताला काळ्या फिती बांधून “संघ शक्ती कलीयुगे” आणि “पटवारी एकता जिंदाबाद” अशा घोषणांनी परिसर दणाणून सोडला.संघटनेच्या पदाधिकाऱ्यांनी प्रशासनावर आरोप करताना सांगितले की, कर्मचाऱ्यांच्या हक्कांसाठी सातत्याने आवाज उठविणारे जिल्हाध्यक्ष भरत पिसे यांना जाणीवपूर्वक लक्ष्य करून सूडबुद्धीने निलंबित करण्यात आले आहे.
संघटनेचा आवाज दाबण्याचा हा प्रयत्न असल्याचा आरोपही यावेळी करण्यात आला.आंदोलनाच्या माध्यमातून जिल्हाध्यक्ष भरत पिसे यांच्यासह चारही ग्राम महसूल अधिकाऱ्यांचे निलंबन तातडीने व विनाशर्त मागे घेण्याची मागणी करण्यात आली.
तसेच नेर तहसीलदारांकडून होत असलेल्या कथित छळाची चौकशी करून दोषींवर कारवाई करावी, ग्राम महसूल अधिकाऱ्यांचे रखडलेले जानेवारी महिन्याचे वेतन त्वरित अदा करावे, सूडबुद्धीने करण्यात आलेल्या विविध कारवाया रद्द कराव्यात व संवर्गाच्या प्रलंबित मागण्या पूर्ण कराव्यात, अशा प्रमुख मागण्या निवेदनाद्वारे प्रशासनाकडे करण्यात आल्या.
यापूर्वीच दि. १८ जून रोजी जिल्हाधिकारी यवतमाळ यांना मागण्यांचे निवेदन सादर करण्यात आले असल्याची माहिती संघटनेने दिली. मागण्या मान्य न झाल्यास वणी उपविभागासह संपूर्ण यवतमाळ जिल्ह्यात तीव्र स्वरूपाचे कामबंद आंदोलन छेडण्यात येईल, असा इशाराही संघटनेच्या वतीने देण्यात आला.
आंदोलनाचे आयोजन विदर्भ पटवारी संघाचे आद्य संस्थापक कै. माखनलालजी यद् साहेब व संघर्षी महर्षी के. व्ही. एम. उजवणे साहेब यांच्या प्रेरणेने तसेच केंद्रीय अध्यक्ष बाळकृष्ण गाढवे यांच्या मार्गदर्शनाखाली करण्यात आले.
या आंदोलनात विदर्भ पटवारी संघ, उपविभाग शाखा वणीचे अध्यक्ष नितेश पाचभाई, उपाध्यक्ष संदेवल कुळमेथे, सचिव मुकेश इंगोले यांच्यासह महिला व पुरुष ग्राम महसूल अधिकारी मोठ्या संख्येने उपस्थित होते.