मोहाळ येथील विद्यार्थ्यांच्या शिक्षणाचा प्रवास आता अधिक सोयीस्कर झाला असून, विद्यार्थ्यांसाठी मोहाळ ते उंडणगाव अशी एस.टी. बससेवा सुरू करण्यात आली आहे. या बस सेवेमुळे सावित्रीबाई फुले कन्या हायस्कूल, उंडणगाव येथे शिक्षण घेणाऱ्या १०० ते ३०० विद्यार्थ्यांना मोठा दिलासा मिळाला आहे. मोहाळ येथील अनेक विद्यार्थी दररोज शिक्षणासाठी उंडणगाव येथे ५ किलोमीटर ये-जा करतात. विद्यार्थ्यांना सुरक्षित व नियमित वाहतूक सुविधा मिळावी, तसेच शासनाच्या विद्यार्थी सवलत योजनांचा लाभ मिळावा यासाठी महाराष्ट्र राज्य मार्ग परिवहन महामंडळाकडे बसची मागणी करण्यात आली होती. ही मागणी लक्षात घेऊन बस सुरु करण्यात आली आहे. यामुळे शेकडो विद्यार्थ्यांनी मोठा दिलासा मिळाला आहे. आता मुलींसाठी शासनाने सुरू केलेल्या अहिल्याबाई होळकर मोफत प्रवास पास योजनेचा तसेच मुलांसाठीच्या सवलतीच्या पास योजनेचा लाभ विद्यार्थ्यांना मिळणार आहे. या उपक्रमामुळे पालकांची आर्थिक व वाहतुकीची चिंता कमी होणार आहे. बस सेवेच्या पहिल्या दिवशी मोहाळ येथे चालक व वाहक यांचा पालकांच्या वतीने शाल व श्रीफळ देऊन सत्कार करण्यात आला. यावेळी दिगंबर संपत दोंगे, देविदास हरिबा सौंदर, तुकाराम श्रीपत जवखेडे, मुख्याध्यापक अनिल लांडगे, शिक्षक संजय लांडगे, संदीप कुमावत, अशोक साळवे, विजय सपकाळ, राजेश चव्हाण, संतोष राकडे, लक्ष्मण मोकासे विद्यार्थी व पालक उपस्थित होते. बससेवेचे परिसरातील ग्रामस्थांकडून स्वागत विद्यार्थ्यांसाठी मोहाळ ते उंडणगाव अशी एस.टी. बससेवा सुरू करण्यात आली आहे. विद्यार्थ्यांच्या शिक्षणासाठी सुरू झालेल्या या बससेवेचे परिसरातून स्वागत होत असून, ग्रामीण भागातील विद्यार्थ्यांना शिक्षणाच्या मुख्य प्रवाहात आणण्यासाठी हा उपक्रम महत्त्वपूर्ण ठरणार आहे. बस सुरु झाल्यामुळे विद्यार्थ्यांसह पालकांनी एसटी महामंडळाचे आभार मानले आहे.
