शिवसेनेकडून आर्थिक मदतीचा हात, शासकीय मदतीची मागणी
सुरेश पाचभाई | मारेगाव
मारेगाव तालुक्यातील सगनापूर येथे विद्युत शॉर्टसर्किटमुळे लागलेल्या भीषण आगीत भूमिहीन शेतमजूर दिनकरराव मोहितकर यांचे घर व संपूर्ण संसारोपयोगी साहित्य जळून खाक झाले. या दुर्घटनेत घरातील विद्युत उपकरणे, धान्य, कपडे तसेच जीवनावश्यक वस्तूंचे मोठे नुकसान झाल्याने मोहितकर कुटुंबावर आर्थिक संकट कोसळले आहे.
घटनेची माहिती मिळताच शिवसेना (धनुष्यबाण) पक्षाच्या वतीने मारेगाव तालुका अध्यक्ष विशाल किन्हेकर यांच्या नेतृत्वाखाली पदाधिकाऱ्यांनी घटनास्थळी भेट देत पीडित कुटुंबाची विचारपूस केली. यावेळी पक्षाच्या वतीने तातडीची आर्थिक मदत देण्यात आली.
याप्रसंगी शिवसेना नेते व माजी जिल्हा परिषद सदस्य आशिष कुळसंगे, माजी जिल्हा परिषद सदस्य सुनील गेडाम, सुधाकरभाऊ गोरे, कृषी उत्पन्न बाजार समिती संचालक ब्रह्मदेव जुनगरी, उपतालुकाप्रमुख प्रशांतकुमार भंडारी, जीवनभाऊ डाकरे, शहरप्रमुख विजय मेश्राम, विभागप्रमुख धनराज भट, सहकारी सोसायटी सदस्य गोपालभाऊ खामणकर, युवासेना तालुका अध्यक्ष निखिल कालेकर,
युवासेना संघटक योगेश नागोसे, कार्तिक नेहारे, राजू कापसे, विकास राऊत, भोजराज मस्की, शामा ठोंबरे, संदीप गानफाडे, अमित तुराणकर यांच्यासह शिवसैनिक आणि ग्रामस्थ मोठ्या संख्येने उपस्थित होते.आर्थिक मदत स्वीकारताना दिनकरराव मोहितकर यांनी मदतीसाठी पुढाकार घेतलेल्या सर्वांचे आभार मानले.
यावेळी तालुका अध्यक्ष विशाल किन्हेकर यांनी संबंधित कुटुंबाला शासनाकडून नियमानुसार मिळणारी मदत मिळवून देण्यासाठी प्रशासनाकडे पाठपुरावा करण्यात येईल, असे सांगितले.दरम्यान, या दुर्घटनेमुळे गावात हळहळ व्यक्त होत असून, पंचनामा करून नुकसानग्रस्त कुटुंबाला शासनाच्या प्रचलित नियमांनुसार तातडीने आर्थिक मदत देण्यात यावी, अशी मागणी ग्रामस्थांकडून करण्यात येत आहे.
