आमदार संजय देरकर यांच्या सूचनेनुसार जीवनावश्यक वस्तूंचे वाटप
सुरेश पाचभाई | मारेगाव
मारेगाव तालुक्यातील सगनापूर येथे रविवारी (दि. ६ जुलै) दुपारी सुमारे १ वाजण्याच्या सुमारास दिनकर अर्जुन मोहितकर यांच्या घराला अचानक आग लागून घरातील जीवनावश्यक वस्तूंसह मोठ्या प्रमाणात नुकसान झाले. घटनेची माहिती मिळताच शिवसेना (उद्धव बाळासाहेब ठाकरे) पक्षाचे तालुक्यातील पदाधिकारी तातडीने घटनास्थळी दाखल झाले.पदाधिकाऱ्यांनी बाधित कुटुंबीयांची भेट घेऊन त्यांची विचारपूस केली.
तसेच तात्पुरत्या स्वरूपात जीवनावश्यक वस्तूंची मदत त्यांच्या घरी पोहोचवून सामाजिक बांधिलकी जपली.दरम्यान, मुंबई येथे असलेले परिसराचे आमदार संजयभाऊ देरकर यांना घटनेची माहिती देण्यात आली. त्यांच्या सूचनेनुसार शिवसेना (उ.बा.ठा.)च्या तालुक्यातील पदाधिकाऱ्यांनी तातडीने मदतकार्य हाती घेत बाधित कुटुंबाला आवश्यक साहित्य उपलब्ध करून दिले.
या मदत कार्यात तालुकाप्रमुख पुरुषोत्तम बुटे, तालुका उपप्रमुख देवा बोबडे, शहरप्रमुख अभय चौधरी, संपर्कप्रमुख बद्रुद्दीन काजी, युवा सेनेचे तालुकाप्रमुख करण किंगरे, तालुका संघटक राजू मोरे, शिवसैनिक संजय लांबट, युवा सेना तालुका संघटक अतुल मस्की, सरपंच दादाराव टेकाम,
विकास राऊत, शामा ठोंबरे तसेच समस्त सगनापूर ग्रामस्थ सहभागी झाले.दरम्यान, आगीत झालेल्या नुकसानीचा तातडीने पंचनामा करून शासनाकडून बाधित कुटुंबाला नियमानुसार आर्थिक मदत मिळावी, अशी मागणी स्थानिक नागरिकांनी केली आहे.
