बातमी ऐका (Marathi Voice Reader)
मुंबई : महाराष्ट्रातील राजकीय घडामोडींच्या पार्श्वभूमीवर शिवसेना (शिंदे गट) मुख्य नेते आणि उपमुख्यमंत्री एकनाथ शिंदे गुरुवारी रात्री उशिरा अचानक दिल्लीत दाखल झाले आहेत. सर्वोच्च न्यायालयात शिवसेना पक्ष आणि चिन्हाबाबत अत्यंत महत्त्वाची सुनावणी सुरू असतानाच शिंदेंच्या या दिल्ली दौऱ्यामुळे राजकीय वर्तुळात चर्चांना उधाण आले आहे.
मिळालेल्या माहितीनुसार, उपमुख्यमंत्री एकनाथ शिंदे आज सकाळी ११ वाजता संसद भवनात पंतप्रधान नरेंद्र मोदी यांची भेट घेणार आहेत. गेल्या बैठकीत ठरल्यानुसार पंतप्रधानांनी ही वेळ दिली असल्याचे समजते. ‘जेन झी’ (Gen Z) आंदोलनानंतर निर्माण झालेल्या देशभरातील परिस्थितीचा आढावा घेण्यासाठी पंतप्रधान मोदी एनडीएच्या घटक पक्षांच्या प्रमुख नेत्यांशी टप्प्याटप्प्याने चर्चा करत आहेत. याच पार्श्वभूमीवर महाराष्ट्रातील राजकीय व सामाजिक परिस्थितीची माहिती घेण्यासाठी शिंदेंना पाचारण करण्यात आल्याची माहिती आहे.
‘ऑपरेशन टायगर’नंतर बैठक…
नुकताच ठाकरेंच्या शिवसेनेतील (UBT) ६ खासदारांनी शिंदे गटात प्रवेश केला आहे. या खासदारांसह शिवसेनेच्या प्रतिनिधींनी नुकतीच केंद्रीय गृहमंत्री अमित शाह यांची भेट घेतली होती. त्यानंतर आता थेट पंतप्रधानांसोबत ही बैठक होत असल्याने याला विशेष महत्त्व प्राप्त झाले आहे.
मंत्रिमंडळ विस्ताराबाबत चर्चा?
या बैठकीत खासदारांच्या मतदारसंघातील विकासकामांवर चर्चा होणार असल्याची चर्चा आहे. येत्या काही दिवसात केंद्रीय मंत्रिमंडळ विस्तार होणार असल्याची चर्चा आहे. या विस्तारात शिवसेना शिंदे गटाला दोन मंत्रिपदे मिळू शकतात. या मंत्रिमंडळ विस्ताराबाबतही पंतप्रधान मोदी आणि एकनाथ शिंदे यांच्यात खलबते होण्याची दाट शक्यता वर्तवली जात आहे.
