परतवाडा सेक्स स्कँडल:पोलिसांच्या भूमिकेवर हिंदू संघटनांचे गंभीर आरोप; नॅशनल युनियन ऑफ जर्नालिस्ट्सच्या अहवालातून धक्कादायक वस्तुस्थिती समोर

अमरावती जिल्ह्यातील परतवाडा-अचलपूर लैंगिक शोषण आणि ब्लॅकमेलिंग प्रकरणात पोलिसांच्या तपासावर गंभीर प्रश्नचिन्ह निर्माण झाले आहे. स्थानिक हिंदू संघटनांनी पोलिसांची भूमिका संशयास्पद असल्याचा थेट आरोप केला आहे. ‘नॅशनल युनियन ऑफ जर्नालिस्ट्स, विदर्भ’च्या सत्यशोधन समितीच्या अहवालात हे आरोप आणि वस्तुस्थिती स्पष्टपणे मांडण्यात आली आहे. या अहवालानुसार, मुख्य आरोपी अयान अहमद आणि त्याच्या रॅकेटचा पर्दाफाश झाल्यानंतरही पोलिसांकडून गुन्ह्याची व्याप्ती कमी करण्याचे प्रयत्न सुरू आहेत. या संघटित गुन्हेगारीला केवळ ‘सायबर गुन्हा’ म्हणून दाखवण्याचा पोलिसांचा डाव असल्याचा संशय हिंदू संघटनांनी व्यक्त केला आहे. मुख्य आरोपीच्या आयफोनमधून जप्त केलेल्या १ लाख ३० हजार छायाचित्रांचा आणि डिजिटल पुराव्यांचा डेटा फॉरेन्सिक लॅबकडून मिळवण्यात पोलिसांना अपयश आले आहे. तांत्रिक तपासात कमालीची दिरंगाई होत असून, अद्याप सर्व डेटाचे विश्लेषण पूर्ण झालेले नाही. याशिवाय, घटनास्थळावरील सीसीटीव्ही फुटेजची आवश्यक तपासणी न करणे आणि पीडित मुलींच्या ओळखीची पुष्टी करण्यात अपयशी ठरणे, यावरून पोलिसांच्या तपासातील त्रुटी समोर आल्या आहेत. भाजप खासदार डॉ. अनिल बोंडे आणि लोकप्रतिनिधींच्या दाव्यानुसार पीडित मुलींची संख्या सुमारे १८० च्या आसपास असताना, पोलिसांना केवळ ८ पीडितांची ओळख पटवता आली आहे. त्यातीलही अनेक मुलींच्या ओळखीची अचूक पुष्टी यंत्रणेला करता आलेली नाही. तपासाची गती संथ ठेवण्यासाठी आणि प्रकरण दाबण्यासाठी आरोपींच्या बाजूकडून तब्बल १० लाख रुपयांची आर्थिक देवाणघेवाण झाल्याचा आरोपही उघडपणे केला जात आहे. तसेच, पीडित कुटुंबे आणि या विषयाला वाचा फोडणाऱ्या सामाजिक कार्यकर्त्यांना धमकावले जात असूनही पोलिसांकडून कोणतीही ठोस सुरक्षा पुरवली जात नाहीये, ज्यामुळे पीडितांमध्ये भीतीचे वातावरण आहे. हिंदू संघटनांनी पोलिसांवर संघटित गुन्हेगारी मोडीत काढण्याऐवजी आरोपींना पाठीशी घालणारी भूमिका घेतल्याचा तीव्र आक्षेप नोंदवला आहे. या पार्श्वभूमीवर, संपूर्ण रॅकेट आणि पोलिसांच्या भूमिकेची निष्पक्ष न्यायिक चौकशी व्हावी, अशी आग्रही मागणी आता जोर धरू लागली आहे.