बातमी ऐका (Marathi Voice Reader)
सांगली: घरासमोर रस्त्यावर खेळणाऱ्या दोन वर्षाच्या चिमुकलीचा चुलत्याच्या मोटारीखाली सापडून दुर्दैवी मृत्यू झाला. सांगलीतील कर्नाळ रोडवर साईनाथनगर परिसरात ही थरारक घटना घडली. ओवी सागर साळुंखे असं अपघातात मृत्यू झालेल्या दोन वर्षीय चिमुकलीचं नाव आहे. याप्रकरणी मुलीचे वडील सागर चंद्रकांत साळुंखे (वय 35) यांनी सांगली शहर पोलिस ठाण्यात फिर्याद दिली आहे. या घटनेनं कुटुंबावर शोककळा पसरली असून सगळीकडे हळहळ व्यक्त होत आहे.
नेमकं घडलं काय?
पोलिसांनी दिलेल्या माहितीनुसार, 12 सप्टेंबर रोजी रात्री आठच्या सुमारास प्रशांत चंद्रकांत साळुंखे (वय 31, रा. संगमेश्वरनगर) हा गाडी (एमएच 11 बीएच 6170) पार्किंगसाठी घेऊन जात होता. तेव्हा साईनगर गल्ली क्रमांक 2 मध्ये ही दुर्दैवी घटना घडली. रस्त्यावरील परिस्थितीकडे दुर्लक्ष करून त्याने गाडी अचानक वेगाने मागे घेतली.
भरधाव कार चारदा पलटी, ‘ते’ दृश्य पाहून पोलिसांना संशय आला अन्…, छ. संभाजीनगरात भयंकर रॅकेटचा पर्दाफाश
दोन वर्षांची चिमुकली ओवी ही अचानक गाडीच्या मागील चाकाखाली सापडली. यात गंभीर जखमी झाल्याने तिचा मृत्यू झाला. या घटनेनंतर आई-वडिलांचा क्रोश काळीज पिळवटून टाकणारा होता. याप्रकरणी चुलता प्रशांत साळुंखे याच्याविरोधात मोटार वाहन कायद्यांनुसार गुन्हा दाखल केला आहे. सांगली शहर पोलीस याप्रकरणात अधीक तपास करत आहेत. मात्र, चुलत्याच्या नजरचुकीने चिमुकलीला जीव गमवावा लागल्याने परिसरात हळहळ व्यक्त होत आहे.
