बातमी ऐका (Marathi Voice Reader)
बीड : जिल्ह्यातील नित्रुड गावचे बाबासाहेब तुकाराम गायकवाड यांच्या आयुष्यात वडिलांचे छत्र हरपल्यानंतर घरची जबाबदारी त्यांच्या खांद्यावर आली. साडेपाच एकर शेती असतानाही त्यांनी केवळ दीड एकर क्षेत्रात झेंडूचे उत्पादन घेण्याचा निर्णय घेतला. मागील सात वर्षांपासून ते सातत्याने झेंडूची शेती करत आहेत. मेहनत, नियोजन आणि बाजारपेठेचा अभ्यास यामुळे या दीड एकरातून त्यांना वर्षाला तब्बल 7 ते 8 लाख रुपयांचे उत्पन्न मिळत आहे.
बाबासाहेब यांचे शिक्षणही सुरू असून शेतीसोबत ते स्पर्धा परीक्षेची तयारी करत आहेत. शेती आणि अभ्यास या दोन्ही गोष्टी एकत्र सांभाळणे सुरुवातीला त्यांच्यासाठी मोठे आव्हान होते. झेंडूच्या पिकासाठी वेळेवर लागवड, पाणी, खत व्यवस्थापन, फवारणी आणि काढणी करावी लागते. त्यातच अभ्यासासाठीही वेळ देणे गरजेचे होते. मात्र सुरुवातीच्या अडचणींवर मात करत त्यांनी दोन्ही कामांचे योग्य नियोजन करण्यास सुरुवात केली.
दररोजच्या कामाचे वेळापत्रक ठरवून बाबासाहेब शेतीची कामे आणि अभ्यास यांचा मेळ साधत आहेत. झेंडूच्या पिकातून मिळणाऱ्या उत्पन्नामुळे घरखर्चाला हातभार लागतो. त्यामुळे शिक्षणासाठीही त्यांना मोठी मदत होते. पारंपरिक पद्धतीने केवळ शेतीवर अवलंबून न राहता कमी क्षेत्रातून अधिक उत्पन्न मिळवण्याचा त्यांचा प्रयत्न आहे. मागील सात वर्षांच्या अनुभवामुळे झेंडू पिकातील अनेक बारकावे त्यांना समजले आहेत.
वडिलांच्या निधनानंतर घरातील जबाबदाऱ्या अचानक वाढल्या. कुटुंबाचा आधार आणि शेतीची जबाबदारी सांभाळताना स्वतःचे शिक्षण सुरू ठेवणे सोपे नव्हते. मात्र परिस्थितीसमोर हार न मानता बाबासाहेब यांनी शेतीला उत्पन्नाचे साधन बनवले. दीड एकरातील झेंडूच्या शेतीतून मिळणारे लाखोंचे उत्पन्न त्यांच्या मेहनतीचे उदाहरण ठरत आहे. संकटे आली तरी त्यातून मार्ग काढत पुढे जाण्याची त्यांची जिद्द कायम आहे.
सध्या बाबासाहेब गायकवाड यांचे लक्ष स्पर्धा परीक्षेच्या तयारीवर आहे. शेतीतून आर्थिक आधार निर्माण करत शिक्षण आणि सरकारी नोकरीचे स्वप्न पूर्ण करण्यासाठी ते प्रयत्न करत आहेत. वडिलांचे छत्र नसतानाही परिस्थितीची तमा न बाळगता त्यांनी स्वतःच्या मेहनतीवर उभे राहण्याचा प्रयत्न केला आहे. शेती, शिक्षण आणि कुटुंबाची जबाबदारी या तिन्ही आघाड्यांवर ते सातत्याने संघर्ष करत असून त्यांची ही जिद्द ग्रामीण भागातील तरुणांसाठी प्रेरणादायी ठरत आहे.
