बातमी ऐका (Marathi Voice Reader)
सांगली: दीड वर्षाच्या चिमुकलीसह गर्भवती विवाहितेचा विहिरीत बुडून दुर्दैवी मृत्यू झाला. सांगलीतील मायथळ (ता. जत) गावात ही हृदयद्रावक घटना घडली. नीता गजानन सोलनकर (वय 29) आणि अवनी गजानन सोलनकर (वय दीड वर्ष) अशी मृत मायलेकीची नावे आहेत. मंगळवारी सकाळी नऊच्या सुमारास ही घटना उघडकीस आली. कौटुंबिक कलहातून त्यांनी टोकाचं पाऊल उचलल्याचं सांगितलं जातंय. मायलेकींच्या मृत्यूनं परिसरात हळहळ व्यक्त होत आहे.
नेमकं घडलं काय?
मिळालेल्या माहितीनुसार, जवळपास तीन वर्षांपूर्वी नीता यांचा गजानन आप्पासाहेब सोलनकर यांच्याशी विवाह झाला होता. गजानन खासगी वाहनचालक म्हणून काम करतात. सोमवारी रात्री पती-पत्नीमध्ये कौटुंबिक कारणावरून किरकोळ वाद झाल्याची प्राथमिक माहिती असून मंगळवारी सकाळी नीता आणि चिमुकली अवनी यांचा मृतदेह विहिरीत आढळला. कौटुंबिक वादातून त्यांनी विहिरीत आत्महत्या केल्याचा संशय आहे.
अंगणात बिबट्या, दारात कुत्रा आणि घरात आजी-आजोबा; नातीनं वाचवले तीन जीव, सांगलीत थरार
घटनेची माहिती मिळताच उमदी पोलीस ठाण्याच्या उपनिरीक्षक धसाडे यांच्यासह पोलीस पथकाने घटनास्थळी धाव घेतली. पोलिसांच्या सूचनेनुसार सांगली जिल्हा आपत्ती व्यवस्थापनाच्या स्पेशल रेस्क्यू फोर्सने विहिरीत शोधमोहीम राबवली. रेस्क्यू पथकाने अथक प्रयत्नानंतर आई-मुलीचे मृतदेह बाहेर काढले.
हृदय पिळवटून टाकणारं दृश्य
रेस्क्यू पथकाने मायलेकींचे मृतदेह विहिरीतून बाहेर काढले. यावेळी दोन्ही मृतदेह ओढणीने एकमेकींना बांधलेल्या अवस्थेत होते. हे हृदय पिळवटून टाकणारं दृश्य पाहून सगळ्यांचेच डोळे पाणावले. मृत्यूचं नेमकं कारण अद्याप समोर आलं नसून उत्तरीय तपासणीच्या अहवालानंतरच ते स्पष्ट होणार असल्याचं पोलिसांनी सांगितलं.
नातेवाईकांकडून सासूला मारहाण
दरम्यान, घटनेची माहिती मिळताच नातेवाईक संतप्त झाले. त्यांनी नीता यांची सासू रखूबाई आप्पासाहेब सोलनकर यांना मारहाण केली. यावेळी घटनास्थळी उपस्थित असणारे पती गजानन सोलनकर यांनी तिथून पळ काढला. गजानन हे फरार असून त्यांचा शोध सुरू असल्याची माहिती पोलिसांनी दिली.
