बातमी ऐका (Marathi Voice Reader)
सोलापूर: सांगोला आणि सांगली जिल्ह्याच्या सीमेलगतचा भाग तसा दुष्काळी म्हणूनच ओळखला जातो. या भागातील बहुतांश तरुण हे शिक्षण घेऊन नोकरी किंवा व्यवसाय हेच मार्ग निवडतात. मात्र, बी. फार्मसीचं शिक्षण घेतल्यानंतर रोजगाराची पारंपरिक वाट न धरता महेश धडस यांनी प्रयोगशील शेतीला सुरुवात केली. गावात दवाखान्यांपेक्षा मेडिकल स्टोअर्सची संख्या अधिक असल्याने दोन एकर शेतात ढोबळी मिरची लावली. प्रयोग यशस्वी झाला. मात्र, आता विकत घेऊन पाणी द्यावं लागत असल्याचं महेश यांनी लोकल18 सोबत बोलताना सांगितलं.
धडस सांगतात की, पिकाची देखभाल पोटच्या मुलाप्रमाणे केली. मात्र, या प्रवासात दुष्काळाचे भीषण संकट समोर उभे ठाकले. शेतातील पिके जगवण्यासाठी महेश यांनी हार मानली नाही. त्यांनी दररोज दोन पाण्याचे टँकर मागवून अत्यंत प्रतिकूल परिस्थितीत हे पीक वाचवले आणि फुलवले. त्यांच्या या अखंड मेहनतीला यश आले असून, आतापर्यंत ढोबळी मिरचीचे एकूण तीन तोडे पूर्ण झाले आहेत. यामधून जवळपास 27 टन एवढे विक्रमी उत्पादन निघाले आहे. ही गुणवत्तापूर्ण ढोबळी मिरची आता दिल्ली, आग्रा आणि अगदी नेपाळपर्यंत विक्रीसाठी पाठवली जात आहे.
Success Story : दुग्ध व्यवसाय करावा तर असा, महिन्याला निव्वळ 2 लाख रुपयांचा नफा, सतीश यांनी सांगितला कमाईचा मंत्र
या यशामागे आर्थिक गणिताची मोठी चिंता दडली आहे. दोन एकर ढोबळी मिरचीच्या लागवडीपासून ते टँकरच्या पाण्यापर्यंत महेश यांना तब्बल 11 लाख रुपयांचा खर्च आला आहे. सध्या दुष्काळी स्थिती असल्याने एक दिवसआड पाणी द्यावं लागतं. त्याचा खर्च सात हजार रुपये असल्याचं महेश सांगतात. बाजारात सध्या ढोबळी मिरचीला चांगला दर मिळत असला, तरी टँकरच्या पाण्यावर झालेला प्रचंड खर्च पाहता मिळालेले उत्पन्न हातात टिकेल की नाही, अशी भीती देखील त्यांनी व्यक्त केली आहे.
दरम्यान, सुशिक्षित तरुणाने दुष्काळाशी दोन हात करत उभारलेला हा प्रयोग कौतुकास्पद असला, तरी पाण्याच्या अवाजवी खर्चामुळे शेतीची आर्थिक गणितं कशी कोलमडतात, याचे हे वास्तव उदाहरण ठरत आहे.
